Letera a un amigo che voria maridarse
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
LETERA
A UN AMIGO CHE VORIA MARIDARSE.
Da quelo che ò sentio
Ti à dunque stabilio
De far quelo che fa la magior parte,
Voi dir, de maridarte.
5Ben lontan dal pensar,
Che ti fazzi una roba da no far,
Te averto, che l'è un passo bon e belo,
Per chi nel farlo dopera cervelo;
Ma che sorgente el ze de mile guai
10Per quei che se marida a ochi serai,
Senza calcolar prima,
Se per idee, per gusti, e inclinazion
Co la dona che i sposa i fazza rima.
Forse ti me dirà:
15«Ti no ti è maridà;
Come vustu mo dunque giudicar
De quelo che ti à ancora da provar?»
Quantunque dir podesse,
Che se vede ogni dì le robe istesse
20Fra poveri e signori,
Radeghi, mal'umori,
Separazion de leto,
Fioi nati per dispeto,
E senza educazion,
25Lassadi in abandon,
Lusso, divertimenti,
Disgrazie, e falimenti,
E altre conseguenze de sto genere,
Che tante case à za ridoto in cenere;
30Pur co la mia opinion
No voi darte lizion;
Solamente me preparo a contarte,
Perchè ti possi megio regolarte,
El caso d'un mio amigo,
35Che dopo maridà
S'à visto desparà.
Un certo Toni Figo,
Zovene, san e belo,
Circa quatr'ani fa,
40Per una tosa s'à scaldà el cervelo;
E quantunque el capiva,
Che a lu sta dona no ghe convegniva,
Perchè la ghe portava,
Co una gran dote de casteli in aria,
45Un lusso, un'anda, e un ton da milionaria,
Inzinganà, scaldà,
Dopo d'aver sie mesi smorosà,
Fra mile idee tute color de rosa,
L'à fato so muger sta so morosa.
50Sto certo Toni Figo,
Che apunto ze mio amigo,
Oltre sie lire al dì come impiegato,
El possedeva, in forza de un legato
De so nona Mariana,
55Dusento e trenta campi in Trevlsana;
Come dunque ti vedi, a suficienza
El gaveva per viver co decenza,
E 'l podeva contar
De trovarse ogni zorno da disnar,
60No gran piati da cogo,
Ma la so carne al fogo,
El so rosto, el so frito, el so bon vin,
El brusco, el marzemin;
No diese servitori,
65Come sti gran signori,
Ma una massera e un omo,
Come che ga qualunque galantomo;
No gondola, teatri, società,
Ma le sere d'istà
70La so mezz'ora a spazzo,
E po el so pezzo in giazzo,
E le sere d'inverno in compagnia
A tombola, o a tresete, la partia;
Per finirla, da povera creatura,
75El sperava de far bona figura:
I primi mesi del so novo stato,
Interogà, come che 'l se trovava,
El rispondeva a tuti: son beato.
Infati so muger
80No gaveva mai fato un dispiacer;
Afetuosa, ubidiente,
Docile, bona, amabile,
La fava in tuto el so Toni Invidiabile.
Mi per combinazion d'alora in qua,
85Sto certo Toni Figo,
No l'aveva più visto;
Lo incontro zorni fa
Malinconico, tristo,
Coi ochi stralunai,
90Coi cavei sgrendenai,
Sbriso, sbriso, patio,
Che 'l pareva un falio.
Lo fermo, e «schiao», ghe digo,
«Cossa ze mai de ti mio caro amigo,
95Te trovo assae cambià...
Dime estu sta amalà?
No so gnente de ti che ze tre ani...
A casa zeli sani?...
Quanti puteli gastu?...
100Com'ela?... cossa fastu?...»
Lu me risponde fredo:
«Ze vero, ze un pezzon che no te vedo...
Se ti savessi... ma!...
Tuto per mi à cambià,
105E la causa, la sola, unica causa
D'ogni disgrazia e d'ogni dispiacer,
Ze stada mia muger...
Cossa? te zela morta?
Eh! se Dio la volesse,
110E che 'l se la tolesse,
Sarave ben contento:
Ma la vive pur tropo a mio tormento!
Ah!... ze megio che tasa...
A revederse... addio... saluda a casa.»
115Mi resto là impiantà,
Fora de mi, pensando
Che quanto aveva visto
No fusse che la pura verità.
Curioso de saver per le so drete
120Le triste metamorfosi de Toni
Vado da Tita Adoni,
Che me le conta tute schiete e nete.
Eco quel che ò sentido in conclusion,
Eco qua sta lizion.
125Dopo un aneto al più,
Che sto bon omo aveva in so muger
Quel che 'l voleva lu,
L'à perso el soravento.
Ela spiegando el so temperamento
130L'à fato del mario in t'un mese e mezo
Un schiavo, un babuin, per no dir pezo,
Lu à provà prima bon, dopo cativo;
Ma, inutile qualunque tentativo,
Nol ga trovà più ben;
135Ela non à buo più fren;
La s'à trato al bon ton,
Come che se sol dir, a corpo morto,
L'à principià a tegnir conversazion,
A far parlar la zente,
140Metendo suso cavalier servente,
A dar dei sontuosissimi soarè,
Feste de balo, pranzi, desunè:
La ga speso no so quanti luvigi
In t'un cembalo a coa fato a Parigi;
145Gran archivio de musica,
Gran terzeti e quarteti de Rossini,
Gran pezzi concertai de Mercadante,
Finali de Vacai, rondò de Nini,
Polize de sartore e de modiste,
150Me lo diseva Adoni che l'à viste,
Da meterse le man in tei cavei;
Insoma a butar via soldi a capei.
El povero mario,
No podendo star drio
155A sto scialaquo, à scomenzà a far stochi,
E in pochi mesi s'à ridoto in tochi.
Ela però no conosce rason,
E la continua sempre de quel ton.
La matina la sta in leto
160Per lo più sin mezzodì,
La se alza, la va al spechio,
La sta un'ora là cussì. —
Vien de musica el maestro,
La va a tor la so lizion,
165Che consiste nel passarghe
Qualche pezzo de passion —
— «No ghe par? per el mio organo
Ze sto assolo un poco altoto...
— Gnente gnente, se 'l ghe incomoda,
170Se pol meterlo un fià soto.»
El la loda, el ghe dà anima
— «Benedeta, forte, apian,
Son contento, o che bel metodo...
A revederse doman.» —
La va a far la so taoleta,
175La se mete, che no so!
Ale tre capita Checo,
I va fora tuti do.
A le cinque i torna a casa,
Eco in tola, i va a disnar,
180Ma el mario no magna insieme?
Lu per lu no ga da intrar.
Dopo pranzo la fa un chilo
Col so Checo sul sofà,
A le oto i se desmissia,
185El cafè ze travasà.
A le nove i va a teatro,
El so palco ze a pepian,
La dispensa da per tuto
Ochiadine, e baciaman.
190Se va a cena a mezzanote
Al salvadego, o al vapor...
Oto, diese, figureve!
Che alegria! che bon umor!
Dopo cena tuti insieme
195I va a bever el cafè,
E po in frota verso casa
I se invia; sona le tre. —
A la porta i se congeda,
Ma Chechin se ferma là,
200Co la scusa verso i altri,
Che qualcossa el s'à scordà. —
I va drento. — A farghe lume
Pronto capita Martin,
I va in camera... ma el resto
205Dimandeghelo a Chechin. —
Questa ze la vita solita
Che conduse sta signora,
E 'l mario ze in pianta stabile
Per sta cocola in malora. —
210No 'l ga un'ora mai de libera,
L'è de soldi sempre a steco,
El combate, el suda, e 'l strussia:
E 'l compenso? lo sa Checo. —
Che sto anedoto dunque a l'ocasion
215Te serva, caro Piero, de lizion.
No aver tante premure,
Tol ben le to misure,
Cerchite una muger
Co tuto quelo che la ga da aver,
220E varda ben, che se ti te minchioni,
No ti è più un Piero, ti deventi un Toni.