Lontananza (Attilio Sarfatti)
|
Edission original: |
Attilio Sarfatti, Le Rime Veneziane e Il Minuetto, Milano, Fratelli Treves Editori, 1892 |
|
Fonte: |
| ← XIV. El solitario de Nina | Edission e fonte ▼ | XVI. I re senza testa → |
LONTANANZA
Son Todaro che brontola e se lagna
Come, co supia el vento, la montagna.
Come el çielo co' piove, o l'aqua al fogo,
Son Todaro che bogie e vol un sfogo.
Dimelo, Giulia mia, dimelo ti
6Se Todaro fa mal a far cussì.
El mio povaro cuor xe sotosora
Come l'onda del mar co gh'è la bora,
Come fra i venti abandonà un batelo
Va senza direzion el mio çervelo.
Giulieta mia, domandighe a l'amor
12Se ga torto o razon çervelo e cuor.
So' un condanà che drio la ferïada
Vede la zente alegra per la strada.
E vive in pena, e dubita pianzendo
Del so tesoro che se sta godendo.
Giulieta mia, domandighe a chi sa
18Quanti tormenti prova un condanà.
Giulieta mia, vien qua, dimele ancora
Le parolete care che inamora.
Vien qua, basime, dime che son mato
A dubitar de ti come che ò fato.
Dime che xe per mi la to passion,
24E che ò pianto e penà senza razon.