Malinconie de un volontario in viagio per l'Africa
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← El bersaglier congedà | Edission e fonte ▼ | Amor... baron → |
Go 'bandonà a Venezia
Sola la mama mia...
E co do basi a Mènega
Mi so vegnudo via!...
Chi ga contà le làgreme
Quando mi so partìo...
Quando, al mio sen strenzendole,
― Care... ― go dito ― adio?... ―
Capisso!... Ormai xe inutile
Andarse a disperar,
Ma co mi penso a Mènega...
Pase no me so dar!...
Vedo nel çiel za prossima
L'ora per mi fatal...,
E ne le stele el simbolo
Come de un funeral!...
Sento che 'l mar me brontola:
«No tornarè mai più!...»
E come un'eco l'ànema
Risponde al cuor: ― mai più!
Mai più! ― Xe dunque inutile
Pianzer e sospirar!...
So Volontario d'Africa...
E là bisogna andar!...
Se per servir la patria
Go avudo sto pensier
De abandonar la Mènega,
La mama, el mio mistier...
Per cossa adesso perderme
Cussì, mò, de coragio...
E far el malinconico
Per tuto quanto el viagio?...
Mi credo che sia l'unica
Lassarsela passar!...
Chi xe imbarcà per l'Africa...
Indrio no pol tornar
Me sento ne le vissere
Un çerto no so che...,
Se me rebalta el stòmego...,
No posso star in piè!
Un vento can, teribile...,
Spenze più in alto l'onda
Che me fa andar a tombole...
E in stiva me sprofonda!...
Ma un Volontario d'Africa
Alegro el ga da star...
Anca se gh'è pericolo
Che se lo ingiota el mar!...