El bersaglier congedà
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← I xe fati per amar | Edission e fonte ▼ | Malinconie de un volontario in viagio per l'Africa → |
Quando che ne l'Esercito
Mi gera Bersaglier
E che gavea la tunica
Col grado de Furier,
Tute le megio fèmene
Che mi podea incontrar...
Co un'ociadina languida
Façeva inamorar!...
Le se diseva, urtandose:
«Varda che brio che 'l ga!...
Varda che toco d'anema!...
Che zòvene intrezzà!»
Go buo Adalgise e... Bòrtole
A mia disposizion;
Donete alegre, e vedove...
E dame del bon ton!
Mi ghe n'ò avudo a Napoli,
A Genova, a Milan...,
A Palmanova, a Udine,
A Padova, a Bassan!
Co le promesse solite
D'amor e fedeltà...
Un souvenir poetico
A tante go lassà!
E so tornà a Venezia
Dove gavea in pensier,
Secondo i fati calcoli,
De voler tor mugier!
Ma adesso che so libero...,
Che crèderme se pol...
Sior no, par impossibile,
Gnissuna più me vol!
Posto che çerte fèmene
Le vive de ilusion...
Ciapo capelo e sciabola
E torno al Bataglion!