I xe fati per amar
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Se fusse un rossignol | Edission e fonte ▼ | El bersaglier congedà → |
Ti xe bionda, rizza e snela,
Tuta grazia e tuta amor;
Ti xe brava, bona e bela,
Ti xe fia de un gran signor!
Mi so inveçe un povareto
Che me strussio come un can;
Ma el guadagno xe discreto
Col mistier che mi go in man!
Sto pèr d'oci, sto bel viso...
I xe fati per amar,
I promete un paradiso
Che mi vogio conquistar!
Se un pocheto diferente
Xe la nostra condizion...
L'amor puro, veramente...
No 'l fa çerte distinzion!
Se 'l papà no xe contento,
No lo vogio contradir,
Ma 'l coragio no me sento
De lassarte e de morir!...
Sto pèr d'oci, sto bel viso...
I xe fati per amar...,
I promete un paradiso
Che mi vogio conquistar!