Meneghina Cinqueta furfantona
|
1557
|
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Iulia come arecordo i di passai | Edission e fonte ▼ | Si canto ben dolci fradei carissimi → |
Meneghina Cinqueta furfantona,
Trista, gaiofa, mariola, golosa,
Prosontuosa, puovera, e carogna,
Sansera, zorziana, e trufadora,
Mala lengua, desutele, poltrona,
Piena de infamie, e de ribaldarie,
Lara, mendica, scorretta, rognosa,
Daspuo che ti è nassua el to mestier
È stao sempre de far sassinamenti,
Decipando l'honor alle brigae,
No so chol mondo si te tegna viva,
E che la terra no te sorba subito
O la iustitia non te frusta, e bolla,
E incoronarte in mezo la berlina,
Perche ti ghe na fato tante e tante,
Besognerave ben per castigarte,
Almanco almanco confinarte a giesolo;
Ti se parente de la tenca ol ragno,
Che si le se maniza un quarto d'hora
Con quella spina le ponze si forte,
Che se resta strupìai de qualche deo
Cusi ti è proprio quando che un te pratica
Almanco chel puol perder si è la fama.
Ah baselisco astuto, e invelenio,
Grami a chi te vien in le to branche,
Che i porta el segno de la to amicitia
Serena carga de zanze, e lusenghe
Sotto un falso operar trista Gabrina,
Folpo che mena i pessi a pascolar,
E puo i magna co i xe ben passui,
Ho piao spesso de le gotorufele,
El piu cavestro pesse no sta in acqua,
De corpo picenin ma insaciabele,
Cusi ti ghe somegi ingorda porca;
Panza d'una Banela, o cao d'ogio,
Buel de cocodrilo, e de morena,
Che diascazze fa'l ciel che no t'arsira,
Azo che in cima i ponti sul storuol
Te veda le persone che ti agabi
No credo mai che i granci te magnasse,
Che ti è tanto cativa, e spuzolente,
Che a malestente i corbi, e le cornacchie,
Te cercherave siando besognosi,
Si che per el Diavolo te lasso,
Che vogio tender alla mia trezuola,
Per viver cho fa i homeni da ben.