Iulia come arecordo i di passai
|
1557
|
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Nicolosa fia dolce ti ha pur torto | Edission e fonte ▼ | Meneghina Cinqueta furfantona → |
Iulia come arecordo i di passai,
El me salta la frieve da tristezza,
Considerando la callamitae
De la mia vita puovera suzeta,
O come giera perso, e consumao
Destruto senza spirito, e cervello
Batuo da la mia sorte traditora
Con la fortuna, che me sopeliva,
Per quanto no faravio quelle bagie.
Andar de note donde, ti volevi,
E sonar, e cantar da desviao,
E puo quando credeva esserte in gratia
Con un rebufo me davi licentia,
A tal ch'ho pianto mille volte al scuro,
No n'ho sapuo trovar tanti saori,
Ni solazzi, piaseri, e servitue,
Ch'habbia durà in bona sette zorni.
Per che ogni fumo te intra in tel naso,
Ti se tanto superba, e boriosa,
Che co te salta la to bizaria
Te spuza el muschio, el zuchero t'incende,
Tegnistu pur al manco sto registro,
E no te dar con certi lipotopi,
Chavioni da fuogo d'hostaria,
Murloni, goffi, cornacchie incantae,
Lassando quei da ben, e honorai,
Che chredistu da star sempre in sti termini?
Con dar canate, e trazerte de tutti,
Cho fa la mosca doro, che de zorno
No se degna magnar di marzapani,
E puo la sera aloza a i necessarij.
T'haveva per zentil, e per descreta,
Acostumà, e del to honor zilosa;
Ma adesso son quel conto cara fuor,
Cho ti fossi una piera, e un bordonal,
Mi e t'ho ben consegiao da buon amigo;
Ma ti ha fatto d'agn'hora el contrario,
E fourazonta ti m'ha in contumacia,
Cuor mio e spiero pur che a qualche tempo
Ti cognoscerà certo le brigae,
E quei che la to gloria ha trabucao,
So ben che ti ha per male de sti arecordi
Vogiando contentar i to appetiti,
Pur sti penserà ben à i casi toi,
Ti lasserà le bestie da una banda,
Tignandote al mior, el ben, e l'utele,
E tornar à far conto, e cavedal
De i amisi che te vuol ben da seno,
E che vorave vederte papessa.