Nicolosa fia dolce ti ha pur torto
|
1557
|
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Franceschina de perle, e de veluo | Edission e fonte ▼ | Iulia come arecordo i di passai → |
Nicolosa fia dolce ti ha pur torto.
A tegnirme tanti anni apicolao,
Timido, vergognoso, pien de smania
Al timon de la barca de speranza,
5Si dormo, magno, camino, e che pesco,
Sempre mai stìon con ti alla fe bona,
Ma certamente si havesse servio
Una Balena, un Folpo, e un Dolfin,
In cao d'un tempo el se haveria grizzao
10A no usarme qualche cortesia;
Cagasangue ti è dura da pair
La to bellezza m'ha cusì sgionfao,
Che ti me sta sul stomego d'agn'hora,
Almanco habbi dolor del mio stentar,
15E no esser ustinà, e colorosa,
Sogiandome ogni dì co fosse un puto,
Che me val esser tanto aventurao,
Pi ch'altri pescaori de Mazorbo?
Ni che cho buto le ree in te l'acqua
20Le se impie in tun trato de pessoni,
Che i vendo le branchae de mocenighi?
E quando credo puo de star aliegro,
Ho tanta passion in le menuse,
Che par che sia di granci che me magna.
25Donde che ho perso squasi el sentimento.
Deh cara, trunta, carpion, e lampreda.
Luceto mio galante, e bravo temolo,
Tenca da late no me far morir,
Perche con poca cossa ti m'aidi,
30No son za tanto bruto e cusi sporco
Murlon, mal custumao, descognosente,
Bavoso, desavio, o deschilao;
Ti fa ch'ha Mazorbo, e a Torcello,
A Buran, a Povegia, e Mallamoco,
35Alle Vignole, Sanrasmo, e Muran,
A Chioza, a Loreo, e a Pelestrina,
A Iesolo, ai Tre porti, Caurle, e grao;
E ho pien de parenti, donne, e homeni,
Di pi mazori, e antighi, e benvoggui.
40E quando te mostrasse le patente
Di nostri antecessori ti diravi,
Che no son hom da farghe tanti arlassi,
Si ti ha piaser de mandarme in ruina,
Te donerò la barca, co i canestri,
45Le ree, i hami, i piombi, corde, e furi,
Sti vuol anche le vuose, e i vardacuori.
Da vero christian tutto te dono.
Pur che ti faghi conto de i to amisi,
E darme qualche volta quatro basi,
50E sti me desi altro, e tende priego
Quando te piase, e con comoditae,
Perche ti sa che son un bon brighente,
E po i monti co i monti no s'ariva,
Ma le persone un dì se scontra in India.