Molin molina
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Luna rossa e Luna bianca | Edission e fonte ▼ | Cantada de magio → |
Guarda che luna in çiel, guarda che gnoco
tuto de argento che sta sera gh'è;
se el se rompesse e n'in cascasse un toco
propio su i piè,
― Molin, molina, —
ti te deventaressi una regina,
e mi saria el to re!
Vegnaria da lontan, tanti parenti
a capararse un cantonsin de tola,1
giraressimo in meso a i complimenti
come una spola...
– Molin, molina –
la nostra vita no saria 'na spina,
ma la saria una viola...
E te faria vegner tanti giornai
co i modei dei vestiti più noventi;2
mi zo in çità montaria su in tranvai
tuti i momenti,
― Molin, molina –
'na carossa toria, 'na cavalina
con tuti quanti i denti.
E la sera a teatro, adio logion,
se crómparia 'na ciave de palcheto,
e come du sposeti del «bon ton»
co l'ocialeto...
– Molin, molina –
se se daria de spianso3 un'ociadina,
maridada a un confeto.
· · · · · · · · · · · · · · · ·
Qualche moscon te rusaria4 de intorno
o qualche amigo che ghe cicaria,
po' un giorno ti te me faressi un corno
e mi te coparia!...5
Molin, molina –
se ti luna te sì la me rovina,
resta lì tacà via!! –
- Note