Ne l'ocasion che a Mestre se inaugura el restauro dela Casa Stela
|
1894
|
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Per faustissime Nozze | Edission e fonte ▼ | Canzonetta a Gilda → |
De Mestre lo stabile
Apena ridoto
Fa sì che più alegro
Mi svoda sto goto.
E brinda solecito
Co' rima novela
Al nostro carissimo
Amigo de Stela.
Scusè se preambolo
Nò ò messo in sti versi
Ma è noto dei omeni
I gusti diversi.
E in fato sta fabrica
Ridota xe stada
Col gusto de chi
La ga progetada.
Credelo infiniti
Xe stadi i discorsi
Per sta riduzion;
Ma gnente i rimorsi.
Perchè el sa proposto
De farla più bela
Spendendo i centesimi
De la so scarsela.
De fati metendose
A far i so conti
L'à visto coi calcoli
Che coi bezzi pronti,
Se fa più che a ciacole
E senza una bega
Nel so fabricato
Un'altra botega.
Alzà el gà in altissimi
El piano de sora,
El ga ben ridoto
De drento e de fora,
E senza bisogno
De Palma e de Gioto
El ga la fassada
De piazza ridoto.
In modo amirabile
Che tuto el paese
El fa el so contento
A tuti palese.
Adunque col goto
Alzando le destre
Brindemo al paese
A tuti de Mestre.
E a quel benemerito
Ex sindaco Berna
Ghe svodo no un goto
Ma una cisterna.
La svodo de cuor
Perchè senza chiassi
La dà l'anatèma
A quatro sbegazzi.
Che gera de fora
A guisa de affreschi
Che in vulgo se ciama
Dei Santi Franceschi.
E per un tal titolo
In modo più vario
Mi vogio brindar
A sto proprietario,
Che à avudo el bon senso
De tor quei sporchessi
Malgrado le ciacole
E i molti riflessi.
Che i gran ciceroni
Che zira la piazza
Voleva insucarlo
Per quela robazza.
E po' per giustizia
Mi brindo a Toniolo
A quel capomastro
Che co' mi lu solo,
À avudo el coragio
De agir imperterito,
Adunque anca a lu
Donemoghe el merito.
Ma basta le ciacole
Perchè un matematico
No pol co' parole
Ma in modo sol pratico,
Convincer chi ascolta
Sta straca parola
Che lu ghe presenta.
A chi xe qua in tola.
Da banda sta filza
De rime e stramboti
Svodè alegramente
Co' mi tuti i goti.
E femo un eviva
Che sia la più bela
Che in mezo de nualtri
Risalta po' Stela.