Per faustissime Nozze
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← El Cafè al Picolo Parigi | Edission e fonte ▼ | Ne l'ocasion che a Mestre se inaugura el restauro dela Casa Stela → |
Per farghe coragio
In zorno sì belo
No solo a Virginia
Ma ancora al fradelo.
O fato el proposito
De dir dei stramboti
Conforme a la logica
Dei tempi coroti.
Coroti per lingua
Che ben s'intendemo!...
Me spiego in vernacolo
Dei tempi che semo...
Adunque l'augurio
Che in tal circostanza
Le boche ve prodiga
Per pura creanza.
Da mi è lontanissimo
E xe mio talento
El farve de' auguri
Sinceri no certo.
Ma un solo, che l'unico
Ve ciamo sinora
Che sto matrimonio
Sia fato in bon ora.
E mi che coi calcoli
Studià ò el positivo
Che sceglio co' l'Algebra
El morto dal vivo,
A mi che la regola
Del colpo de man
Son pronto a insegnarghela
Al gran mussulman.
Che fasso l'analisi
Su ogni elemento
Che spiego la forza
De l'oro e l'arzento,
Che porto la bussola
Tacada a pendente
A quela flessibile
Caena vivente,
Che za imaginarse
Pol tuti e saver,
Che per giusto titolo
Se ciama muger,
Che a furia de calcoli
De studio e dileto
Gnancora ò spiegada
La forza del leto!
E sì che longhissimi
O i spazi zirai
In vesta da camara
E coi caramai!...
Studià go l'elastico
El tenero el duro....
Ma sempre è un incognita
El leto, ve zuro!
Col caldo insofribile
Che fa che se sua
Col fredo iritabile
Che fa che se spua
Col gusto dei pulesi,
Co' quel dei mussati,
E co' ogni specie
De sforzi da mati,
Provà gò el provabile
Ma za ghe scometo
Che resta un'incognita
La forza del leto.....
E za che a sto termine
So giunto in sto zorno,
O sposi carissimi,
Fè vualtri ritorno.
Sui studi geometrici....
Studiè pur la sfera
Unita e l'elitica
Del cielo e la tera...
Chissà che col meterve
Un qualche costruto
Possiè ricavarghe
Un poco de tuto....
Sciolgè sto durissimo
Sto gropo gordian,
Studiè el leto in enfasi
Tolė tuto in man....
Savè che è notissimo
Che pol chi che vol....
Butè a la malorsega
Cusini e niziol....
E se da quest'ultimo
Spediente solene
Restè confusissimi
In mezo a le pene,
Un ultimo oracolo
Andè a consultar
El moto del pendolo
Che mai pol falar...
De razza prolifica
Natura xe lege,
Vora che continui
Le nostre famegie.
E via ch'el telefono
Ze là che ve ciama...
Un baso del sposo
Ve manda la mama.