El Cafè al Picolo Parigi
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← El pare dei poveri | Edission e fonte ▼ | Per faustissime Nozze → |
Ancùo ch'el reclame
Vegnuo xe de moda
Lo fasso lunghissimo
Co' tanto de coda.
Xe noto notissimo
Ch'el vecio cafè
Del Picol Parigi
Se sa dove el xe.
Ma a tuti è un incognita
E a dirlo me provo
Ch'el xe un gran simpatico
E caro ritrovo.
In mezo a le bibite
Le più prelibate
De Alpin e de Wermouth
De vin, ciocolate,
De graspa finissima,
De fero chinato,
Se trova spessissimo
Un bon praticato.
Al banco alternandose
Lorenzo e Spadari
Se vede quest'ultimo
A far dei lunari
Co' tanto de recipe,
Ossia portafogio,
Che nota dei crediti
Voltando ogni sfogio.
Se vede imancabile
La Nene al burò
Co' numeri arabici
Notar come i fo.
Se sente spessissimo
Spadari rusar
Per questo e per quelo
E po' tarocar.
Alora la vecia,
Simpatica Nene,
Co' dolci parole
Ghe queta le pene.
L'è quelo un istante
De granda emozion
Che mete 'l cafè
In gran convulsion.
E fora espressioni
Le più calorose
Fra Nene e Spadari
Co' tanto de vose.
Se sente Longheti
E a drio l'inzegner
E tuti far coro
Co' molto piacer.
Se manda in malora
Paroni, aventori
Chi paga e chi cerca
Vegnir debitori.
Alora sucede
Un gran pandemonio
Che termina subito
Co' vien Sior Antonio 1.
Se mai la parona
Se acorze del fato
Alora rimedia
El nostro avocato.
Opur la Veloce
Col sior Chiereghin
A tanto bordelo
Trovarghe sà el fin.
Se ghe el Segretario,
Co' tanto de ociai,
Alora dasseno
Che semo fregai.
Perchè quel ometo
Ga sangue in le vene
Se cassa prestissimo
Darente la Nene.
E questo xe el culmine
De un vero bordelo,
Saraca Spadari
Tirando zo el cielo,
E guai al magrasso
De quel aventor
Che prova a parlar,
Fra tanto rumor.
El solo Longheti
Vien fora talvolta
Co' una promessa
Che Nene no ascolta.
Promete a Spadari
'Na carta da cento
Se a Nene el spinacio
Sa meterghe drento.
Sta lauta promessa
Spadari consola;
Ma Nene po' trema
De star in parola
A tanto e po' splendido
Vistoso regalo
Spadari za teme
De meterlo in falo.
E ben ricordandose
Del caso fatale
Che a lu ga tocà
El sbassa le ale.
Bologna, Bologna
L'esclama pensoso
Che ti me fa perder
Regalo vistoso.
E via tuti i zorni
Continua in sto modo
Ste ciacole alegre
Che tanto me godo.
Da bravi mortali
Vegni a sto cafè
Co' Nene e Spadari
Alegri starė.
- Note
- ↑ el paron del cafè.