Ne l'ocasion che se magna un lievro coi amiçi
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Una partia a Briscola fra quatro amici | Edission e fonte ▼ | L'avocato del Torin → |
De opere classiche
Su vario sogeto
Go visto in catalogo
Segnae per dispeto.
Go visto miracoli
De raro talento,
Go visto filosofi
Cavarsela a stento.
Go leto poemi
De omeni doti
Tratar seriamente
Do cani e simioti,
A tuti è notissimo
Ch'el nostro Bufon
De bestie svariate
Ga dà più lezion
El storto d'Esopo
E tanti a lu drìo
Ga fato parlar
Perfin el conio.
Chi à dito del manzo
E chi del cavalo,
Chi assae gà parlà
Più del papagalo
E basta citarve
El Casti fra tanti
Che à fato un poema
Le bestie parlanti.
Insoma in sto secolo
E in queli passai
De bestie argomenti
Ghe n'è sta tratai..
Mai più come adesso
Se rende imortali,
Le bestie coi omeni
Se fa quasi eguali.
Difati se memora
In t'un monumento
La bestia co' l'omo
E l'omo è contento.
Perfin xe sta inciso
Su piastra 'na marca
De soto la gata
Del somo Petrarca.
E tanto xe strambo
De l'omo el matesso
Che no me stupisso
Se fassa l'istesso.
Del nostro magnanimo
Tonin ai giardini
Cioè a la so morte
Onori divini!....
Se dopo sta sgnesola
De esempi e de fati
Ghe xe qualche stupido
Che daga da mati
Nemanco me degno
De vederlo in ciera
Perchè so sicuro
Ch'el ga el cuor de piera.
Che se nel ridicolo
El mete sto lievro
De do scopeloti
No pol andar scevro 1.
Al solo pensarghe
La bile me monta...
Ben... lasso che altri
La storia ve conta,
De questa dolcissima
E cara bestiola
Che qua destirada
Vedė su la tola.
Sta timida vergine
Che mi za imortalo,
Me basta che adesso
No sia tolta in falo
E che nel gustarla
Tornar possa a cao
Sicome alorquando
La fava gnao gnao.
- Note
- ↑ Licenza poetica.