Ottobre
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Fogie d'autunno | Edission e fonte ▼ | Notturno → |
.jpg)
Cui dolet, meminit.
Cic. Pro Mur., 20.
LA diga, Don Bressan
Ch'el torna dal paese,
Vendemieli a Salzan,
Vendemieli a Riese?
El mosto xelo san?
Che nove galo intese?
Ah, per un bon cristian,
Otobre xe un gran mese!
El fredo xe lontan,
El caldo xe andà via,
Se dorme da sovran,
Se magna in alegria,
Se tien el goto in man...
Amen e cussì sia!
Ghe xe calamareti
A Ciòza, o i se lamenta?
I primi cievoleti
Se magna a Malcontenta?
I osti dei paeseti
Su i àrzeni de Brenta,
Fali zà i oseleti
Conzài co la polenta?
O i zorni che la zente
Pregava ai mii zenoci
El Pare Onipotente!
Che adesso gò nei oci
El pianto, e, ne la mente,
I risi coi peòci!
Pazienza, zà, prudenza!
Lo so, paron, lo so,
Che tuti, con licenza,
Me canta sto rondò.
Mo salo lu a Pazienza
Cossa i gà fato? No?
I gà... ma, in confidenza,
Doman ghe lo dirò.
Basta; de vero cor
Disemo la corona
Al nostro Protetor...
Come? Nol sa? Madona!
Ma geri, caro sior,
Geri xe stà San Mona!