EL COMÒ
G’ò in càmara un comò, vecio,8 intarlado,
De quei del çinqueçento e ’na velada:9
L’è in tochi, el gà ’na gamba scavessada,
No ’l g'à più in mente d’essar sta lustrado.10
Me pora nona la lo avea comprado
De sedes’ani, quando i l’à sposada:
La ghe metea la biancaria incolada,11
E a la so morte mi l’ò reditado.
Da puteleto — me par proprio ancò! —
Se mi andava a trovar la me veceta,
Dopo du basi ela corèa al comò.
«Staretu12 bon?.. làssitu star la cagna?..
Dime ’n’Ave Maria... to’ ’na conseta».
Ah, quel comò l'era la gran cucagna!
