G’avemo in Brà47 un lunario, ’na specie de Poiana,48
Ch’el ne segna ogni festa che gh’è fra setimana.
El dì del gnocolar,49 le fiere de i cavai,
L’esposission, le corse, e i tanti saravai,50
Che i fa ciapar de i bassi, che i ne descanta fora,
Che i farà de Verona, ’na çitadina siora.
Quando che gh’è i congressi, el giorno del Statuto,
La nassita del Re; el segna tuto, tuto...
Ma ’ndo’ elo sto lunario? tacado in t'un canton?
Piturado sul muro, o elo un tabelon?
No savì indovinarlo? L’è quel bel pissaroto51
De acqua fresca e ciassosa che vien da l’acquedoto:
Quando che sem’ de festa el te ghe va de vena
A butar52 fora l’acqua più in alto de la Rena.53
El g'à po’ ’na morale par qualche veronese
Che se imbriaga almanco un trenta volte al mese;
Sto pissaroto el dise: «O amiçi del quintin,
Bevì de l’acqua fresca e lassè54 star el vin! »
