LE VÈCE DEL SABATO
Al sabo de matina — inverno o istà —
Dove gh’è ’na botega o gh'è un porton,
Se vede de le vèce in procession
Che fa el mestier de andar par carità.
Le g'à in testa un fassol65 che fa pietà
E infilado in te ’l brasso un gran sporton;
Le va via mese scalse e a strapegon;66
E le gira così mesa cità.
Ci ghe dona du bessi, ci un paneto,
Ci qualche strassa da portar adosso;
E le sbrodola Requie par dispeto.
Le va a la çerca par l’amor de Dio,
Ma a ci ghe dise: “No ghe n'ò, no posso...„
Quante maledissioni ghe va a drio!
