BIANCARÌA AL SOL
(Mi e la lavandara)
— Guarda che roba fina, che merleti!
L’è roba, quela lì, da gran signora;
Che manine sarà che la lavora,
Le se guadagna çerto de i francheti.
Lì, rente, quele strasse da poareti,
Le rusa69 la canson de la malora;
Guardarle in spera70 se ghe vede fora,
E i è busi71 e taconi malingreti! —
— Sior, quei taconi72 i val tanti sudori,
E quele che li fa no g'à rimorsi;
Se sa, i è cose che no porta i siori!
Ma ste robe che el vede ricamade
I è de una che magnava el pan co i torsi,
E ancò la fa la siora.., sensa entrade! —
