Per ocasion del matrimonio Bianco-Bilesimo
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Ancuo, che coi vincoli
De sposa ti à streta,
Mio caro Girolemo,
4La to Marieta,
Per darte un indizio
Del mio giubilar,
Dei coniugi el codice
8Te vogio donar;
Che dopo un decenio,
Che fazzo el legal,
Se monto anca in catedra
12Nol credo sto mal.
So, sposi, che inutile
Xe 'l darve un consegio,
Che senza sto codice
16Pensè sempre al megio:
Ma 'l xe un solo articolo,
Lezelo de volo,
L'è scrito in sti termini:
20«Usè un ochio solo.»
No stessi a sorprenderve
L'è proprio cussì:
Voressi un interprete?
24Sì, sposi, qua mi.
Se con un sol ochio
Vardè tuti dò,
La cossa più frivola
28Pol farve bon prò:
El belo za in genere
Savè nol se dà:
L'è afar de capricio,
32Nel genio la sta:
Co un ochio medesimo
Se tuto vardè
Del belo la massima
36Egual ve formè.
Del ben le delizie
Le xe relative;
Chi l'acqua desidera,
40Chi 'l pian, chi le rive;
Chi cerca la chierega,
Chi vol el pandolo:
Ma tuto se comoda
44Co l'ochio xe un solo.
Savè za la storia
De quel canochial,
Che gera un prodigio
48Per far natural,
Che sina le machie,
Che gh'è in te la luna,
Rendeva palpabili
52A una per una;
E un prete, osservandole
Con una signora,
Questioni gravissime
56L'avea tirà fora,
Perchè, quel modesimo
Ogeto fissà,
Diverso spetacolo
60Gavea presentà;
Al prete de un tempio
Col so campaniel;
A st'altra, filosofa,
64Do amanti in tel miel.
Seguindo el mio codice
Ghe dava in tei ochi
O a lu la melagine,
68O a ela i batochi.
Dirè mo, che equivoco,
Che no un ochio sol,
Ma diese, ma quindese,
72Piutosto ghen vol.
Facendo sto calcolo,
Saressi in ingano;
Se mai fè la guardia
76Ve nasce el malano.
Giunon per el discolo
So Giove à trovà
Un Argo centochio,
80Epur no à giovà:
Oh guai! co se dubita
De vederghe massa;
Un ochio solissimo
84Averto se lassa.
Studièla, zirevela,
Ma siè persuasi:
Prevede el mio codice
88Tutissimi i casi.