Pronostico de l'ano 1837
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1836 | Edission e fonte ▼ | Pronostico de l'ano 1838 → |
La cossa la ze chiara
L'è asioma che no fala, el ze evidente,
Quanto più l'omo studia e più l'impara,
E mi, sia dito pur modestamente,
Che per bona ventura
E per voler del cielo
Me trovo favorio da la natura
E de zufe, e da zafe, e de cervelo,
Ossia che la m'à dà
E memoria e inteleto e volontà,
De principi piutosto delicato
Go sempre procurà
De no mostrarme ingrato,
E a forza de fadiga
E de suori,
Lasso che i mestri diga
Sora del conto mio quel che i vol lori,
No ghe ze stà mumento
Sin da la prima età
Che no gabia cercà
De star in esercizio col talento,
E aprofitar dei doni
Che a pochi la concede,
Rason apunto per la qual se vede
Da per tuti i cantoni
Un numero infinito de meloni,
Una strage de classici somari
Che no à passà le scuole elementari,
E che fra le manteche e i bergamoti
I spuzza che i revela da dindioti.
Quando po che coi ani so andà avanti
No ò fato come tanti
Che lassa in t'un canton
Virgilio, Ovidio, Orazio e Ciceron,
E apena se dileta
Qualche ora brusada
De darghe una passada
A la gazzeta,
Ma a studiar me so messo note e dì
Co le man e coi pì
Per far che 'l nome mio
No resta nel'oblio,
Meta, che, a dirla senza ostentazion,
Go la sodisfazion
De aver tocà,
Perchè in astronomia
Nissuno el primo me lo porta via
Dopo de quel tantin che go stampà
Su le mie planetarie osservazion
Co le quali ò spiegà,
No minga da schieson,
Da oracolo deciso
Nel modo el più preciso
Per un corso de ani
De la natura i misteriosi arcani.
Anzi per la mia fama podaria
Bastar la profezia
Del trentasie perchè no go falà
De un ete, e le ga visto
Se s'à verificà
Quel che ò previsto.
El fredo n'à consà co le ceolete,
A grado che in april qualche zornada
Bateva le brochete
Quei che faglio gaban gera in velada;
Tuta la primavera
La ze stada severa;
L'istà caldo insistente
Da descolar la zente;
E l'autuno per tuto
Quanto se pol mai dir molesto e bruto:
La piova e la tempesta
N'à consolà da festa:
Per el furor dei venti
S'à perso bastimenti:
La neve nel feltrin, nel udinese
La ze cascada in tanta quantità
Che la ga subissà
Piu d'un paese:
Se ga visto l'eclissi, la cometa
Come che l'ò predeta:
In più de qualche logo
Ga fato dani el fogo:
Ze comparse le aurore boreali,
À dà su temporali
De quei da confession
Coi tiri de canon:
Teramoti, che qua graziando Idio
S'à limità al pipio,
Ma che à porta rovine
Nele tere vicine:
Ze comparse meteore e in conclusion
Per tute le rason,
E spezialmente per le malatie,
S'à avudo un trentasie,
Che nela storia
Del so compagno no ghe ze memoria.
E postochè za el nome me l'ò fato,
E vedo che per trato
De infinita bontà de Quel Dessora
Bisogna che laora
Come un can
Per guadagnarme 'l pan,
Nè libere me resta
Che l'ore de la note e qualche festa,
Rico abastanza d'ani e de schinele
Pensando a la mia pele
Dovaria
Lassar l'astrononiia.
Perchè le ze fadighe da fachini
Tirar de canochial sina ai matini.
Nonostante animà
Ben giustamente
Da la piena acoglienza, dai favori,
Che un publico severo e inteligente
El gà sempre acordà
A tuti i mii astronomici lavori;
Memore che za ani
Una degna persona, un omo doto,
Scrivendo sui poeti veneziani,
Ga el mio nome fra i classici introdoto;
Che un famoso poeta trevisan
In certa so graziosa produzion
Stampada nel dialeto venezian
De mi à fato onorevole menzion;
Che l'Apatista al massimo cortese,
El qual vegniva fora in sto paese,
Un mio presagio riportando a tochi
M'à scrito un panegirico coi fiochi;
E assae soleticà,
Confesso el mio pecà
Per l'improviso elogio
De quei de nova data,
Che generoso l'estensor del fogio
M'à gratis regalà co la salata
Ai vintitre genaro
Nel mumento che qualche testa sbusa
Ghe tagiava el tabaro
A la mia musa,
E senza remission a piena boca
La tratava da scioca
Disendo a spale mie
Tantissime busie,
Dopo aver ben pensà
Me son determinà,
Sicuro de una prospera riuscita,
De andar dessù in sofita
A consultar per l'ano trentasete
La lima, el sol, le stele e le comete.
A forza de mumenti tolti ai soni
Co strussie e co gran stenti
Go dovudo impiegar do mesi boni
A forbirme le lenti,
A fregarme i latoni,
A preparar le machine, i strumenti,
A disponer le sfere, i mapamondi,
A regolar la bussola de azzal,
A montar el relogio dei secondi,
A meter in asseto el canochial,
A destirar le carte,
Tuti i atrezzi de l'arte,
A tirar fora da la libreria
L'infinita caterva de volumi,
Che su l'astronomia
In qualche caso me pol dar dei lumi,
E a deschiavar la magica casseta
Coi riporti d'arzento
Che ga la so secreta
Indove tegno drento
I scartafazzi
Co le felici idee che molo a brazzi.
E sicome in virtù del studio fato
Go visto in conclusion
Che qualunque sia cossa del creato
Ze co tute le altre in relazion,
E che per conseguenza
Ga le stele e i pianeti
O direta o indireta un'influenza
Su l'arti, su le scienze, e sora i ogeti,
E cussì viceversa e quele e questi
Coopera
O controopera
A le cosse celesti
Co manco o più frequenza
Secondo el grado de la so potenza,
Avendome prefisso de stampar
Anca per st'ano
Un lavoro che possa sodisfar
Senza condur el publico in ingano,
M'ò fato un fià a la volta
Spendendo i mii talenti
Una estesa racolta
De elementi,
Che chi no se ne intende
Se i li vede,
Indrio co le scriture, i se sorprende,
Perchè nissuno crede
Certamente
Che col mio studio i gabia da far gnente.
Go opere de costo su le scienze,
Go antichi manoscriti,
Go proverbi, go epigrafe, sentenze,
Go libri de istruzion che ze proibiti
Perchè i svegia la mente
Tropo rapidamente,
Go cronache, go codici, go anali,
Go opuscoli, giornali,
Go storie, go comenti, go sermoni,
Go la serie completa dei schiesoni,
Go distici, go acrostici, e soneti
Per muneghe e per preti,
Go racolte per nozze a bataglion,
Go poemi, capitoli, canzon,
Go epitafj, sciarade, go anagrami,
Logogrifi, epigrami,
Go farse, go comedie,
Go drami, go tragedie,
Go un tratato anatomico sui granzi,
Dodese canti in versi marteliani
Sul pevare dei cani,
Una disertazion sora le sepe,
Un discorso patetico sul sempio,
Un poema sui pugni e su le slepe
Co qualche bel esempio;
Go tuti i calepini,
Go el messal non plus ultra dei rabini,
Go bibie, go alcorani,
Go antichi talismani,
Go varie pergamene, go diplomi,
E go dusento tomi
In lingua greca
Sul cossa che vol dir salameleca;
Go libri de magia, de bossoloti
La storia dei subioti
De qualunque misura,
La scuola del'usura,
Le analisi sul ruto,
La logica del muto,
La scienza de le fade,
L'elogio al do de spade,
Un episodio su le situazion
Dove se fa sentir le tentazion,
Cinquecento tratati
Su le cause dei parti anticipate
E l'opera famosa che à scoverto
La precisa rason che l'u ze averto.
Go moltissimi quadri originali
A paragon dei quali
Queli de l'academia a le bel'arti
Se pol chiamarli scarti
A la parola,
Ghe no sora la tola
Ghe n'ò sora la tela,
Ghe n'ò fati a pastela,
Su sogeti sia sacri che profani,
Go ritrati infiniti de putele
Dai quindese ai vint'ani
Che da el beco a le stele,
Go dei fiaminghi de famosi autori,
Che m'à costà tesori,
Fra i quali do che trovo
De un gusto afato novo.
Nel primo gh'è in cusina una yechieta
Col nevodo in seleta,
Tantofato,
Che zoga a le manatole col gato,
E ciga — oh Dio! —
Perchè 'l ga dà un sgrafon,
E ela in t'un canton
Che a so mario,
El qual se mostra a tuto indiferente,
La ghe dise irabiada — bon da gnente —
In st'altro gh'è una tosa simunita
Co la candela in man
Che conduse un vilan
Dessù in sofita,
E par che coltivando certe trame
La lo sconda in tel logo del polame.
Go un pezzo del Bassan
Nel qual el mostra intrepido Sanson
Che scalmanà co tute do le man
Se strucola un limon
Co tanta forza
Che cavandoghe sin l'ultima giozza
Da la scorza
L'impenisse una bozza.
Go el celebre lavoro de Giorgion
Sul salto del molton
Cussì espressivo
Che l'animal par vivo.
Mi son el possessor de la gran tela,
Opera de Carpazio la più bela,
Che ga dipinto el campo de la tana
Co la casta Susana,
La qual a un zizoloto
Libertin
Ghe refila un sberloto
A lustro fin.
Mi go de incerto autor
Un quadro de valor,
Dove se vede
Arente de Archimede
Un zovene ben fato,
Che in modo alquanto strano
Ghe presenta el spacato
Del palazzo de Tito Vespasiano,
E lu col cogionelo
Prima lo varda, e po ghe dise — belo —
Go la famosa pala de Tizian
Rapresentante Orlando paladin,
Che buta zo el gaban
E zoga al tamburin
De do zechini
Co quelo da le tripe e dai penini.
E go dei afreschi cussì sorprendenti
Ch'anca de gran istà
Basta vardarli i fa
Bater i denti.
Go molte stampe inglesi,
Go strage de disegni,
Vedute de paesi
De diferenti regni,
Go rami,
Go ricami,
E in seda e in oro,
De done da cartelo
Amanti del lavoro,
Go qualche bel modelo,
Go zessi, go sculture, go incision,
E go la colezion
De tute le medage che i ga impresso
Da Adamo sin adesso.
Go ganzi e rampegoni,
Go magi, go bastoni,
Go trapani e scarpeli,
Go subie, go marteli,
Go denti de fatori,
Go forfe da sartori,
Go britole e cortei,
Go leve e manganei,
Go spade, go tromboni,
Go schiopi, go canoni,
Go scudi, go visiere,
Go aste, go bandiere,
Go stochi, go atagani,
Go elmi, go corazze,
Che al tempo dei romani
Ze andae per le scoazze,
Go scurie, go speroni,
Turbanti e baretoni,
Go scarpe coi galani,
E fiube de zergoni,
Che portava i spartani
Nele mudande invece de botoni.
Go rare e papagai,
Go un drago da sie teste,
Go osei del Paraguai
Co le so creste,
Go gazze, go storneli,
Quagioti batareli,
Bisati americani,
Falcheti e barbagiani,
Go scimie, go mandrili,
Dolfini e cocodrili,
Go scheletri, go mumie de l'Egito,
Go el gran mostro turchin,
E go un ermafrodito
Nel spirito de vin,
Che per aver menà
In Monaco una vita libertina
L'à fenio snombolà
Da mal de orina;
Go un orso in salamora
Trovà morto da fame
Tra Sodoma e Gomora,
Go un imenso corbame
De pantera,
Che pesa senza l'osso quatro miera,
Go denti d'elefante
De mole esorbitante,
Go un toro in caramel ben conservà,
Go un beco imbalsemà,
Gran composte de aborti
Messi zo parte vivi e parte morti,
E go in t'un camerin
De la sofita
Do sirene che canta in aquavita.
Go rospi del Bengala,
Go vovi de farfala,
Un osso de formagio,
La coa d'un scarafagio,
Un ongia de balena,
Un ochio de pantena,
La testa d'un caviaro,
Animal in Europa che ze raro,
Ma che i naturalisti.
E tanti doti,
Assicura anca qua che i ze stai visti
Nei secoli rimoti.
Go bossoli, go scatole
Go mescole, go spatole,
Go vasi, go bozzete,
Go techie e go pignate,
Tantissime ricete
Per far vegnir el late;
Go unguenti, go saroti,
Manteche e bergamoti,
Go spiriti e pomate
De le più ricercate,
Go l'essenza del manio,
Go la fogia de Adamo,
Go l'ogio del zucon,
L'estrato de melon,
La cola de triaca,
El sugo de tanaca,
Impiastri per le dogie,
Secreti per le vogie,
Brodi per paralitici,
E polvere de corno per i stitici,
De la qual ghe ne ze un consumo grando,
Se qualunque spizier
Che conosce 'l mistier
La dà de bando.
E per antichità
Un pocheto a la volta
M'ò fato una racolta
De tante rarità
Che se stenta a trovar
Se tuto el mondo
Se se mete a zirar
Da capo a fondo.
Go un osso de brisiola
De porcelo,
Che se supone la sia stada a tola
Del console Metelo
Co l'à invidà Pompeo
A magnar le lasagne a scotadeo.
Go la famosa fogia de latuga,
Che s'à messo su un brusco Menelao
Aciò che 'l se ghe suga
O che 'l ghe vegna a cao.
Go el pontal de la cana
De la fada Morgana,
El magico cameo
Che la portava in deo,
E go el manestro co le campanele
Che ghe serviva a far le pignatele.
Go un stampo da salai
Che se usava nei secoli passai,
In quel tempo beato
Che tuti gera larghi de gargato.
La cagola de un sorze pantegan,
Che ga chiapà a la Mira
Azzardando la vita Coriolan.
Del peso d'una lira,
De la qual Stramanon naturalista,
Che ze fra i rinomati,
Ga dà cento ducati
A prima vista,
E co guadagno l'à venduda dopo
Per cagola de topo.
Go col so calcinazzo un dente ochial
De quel'omo bestial,
Che dabasso in cantina
Ga morsegà le tete a la regina,
La qual dal gran spavento
Ze andada in svaniraento,
E ga volesto, cussì scrive el Doti,
Che 'l sia copà a sberloti
In so presenza,
E po che ghe sia leta la sentenza.
Go la spina dorsal
De quel zigante,
Prodigio de la storia natural,
Ricordà nel poema del Morgante,
Che à vissudo in romagna,
E che co un so spuachio
El ga inondà gran trato de campagna,
E à prodoto le vali de Comachio.
Go un zoco da becher
Che par de cornoler,
Ma a quel che dise
Persona inteligente
El gera la raise
De un calo sorprendente,
Che gaveva in t'un deo
Martin fio de Pompeo,
El qual a conto fato
Ga in calegheri consumà el so stato.
Go una corniola de crestal de monte,
Dove se vede incisa a la lontana
La barca de Caronte,
Che se cazza in cavana
Perchè piove,
Ganimede co Giove
Che buta zo el capelo e la velada,
E in presenza de Apolo
Su una publica strada
Fa la partia al pandolo;
Diana sconta in tel bagno
La cima de la ponta del calcagno
Co Ateon che la varda e no la toca,
E come le marmote
El se lica la boca
E po l'ingiote.
Go i mustachi da gala
De Roberto assassin,
Go un pelo del bruschin
Col qual el sanguinario Caracala
Arivà vincitor soto Verona
El s'à netà i stivali a la dragona.
Go un toco de spuarola de Lutero
Col manego de vero
E 'l pedestal d'arzento,
Dove se vede drento
Cussì chiari
I segni variopinti dei catari,
Che ogni medico acorto
Studiandoghe un pocheto podaria
Dir da che malatia
Lutero è morto.
Go un spareso otoman
Racolto nel giardin
Del turco Soliman,
E da lu regalà
Al principe Kulin,
Grando come un salà
E tanto conservà
Che a ben vardarlo
Vien vogia de magnarlo.
Go el beco cariolà
De un certo papagà
Che à vissudo al Perù del quatrocento,
Un mostro de talento,
Che con qualche felice risultato
Facendo l'avocato
Ga avudo po la sorte
De coverzer un posto a quela corte,
E quando l'è mancà da consunzion,
Dise la storia,
L'imperator Mamon,
Bona memoria,
Certo de no trovar in tuto el regno
Del morto un sucessor che fusse degno,
El ga sopresso el posto sul mumento,
E ga de so scarsela
Nela real capela
Ereto un monumento,
Che ga costà tesori,
E ze l'amirazion dei viagiatori.
Go po tanti altri ogeti
Nei quali fa veder madre natura
I so più strani e prodigiosi efeti,
La so imensa bravura,
Ma a sto passo
La descrizion stralasso,
Perchè da galantomo
No bastarave un tomo.
Da sti vari elementi sussidià,
E dopo aver cavà
Co la maniera mia particolar
Quanto l'inzegno uman pol mai cavar,
Al studio go da drento
De tuto el firmamento,
Facendo sto festin
Dal nascer de la note sin al fin.
E rifletendo che
Senza saver perche
I astronomi viventi su sta tera
I s'à scaldà la testa co la luna,
Nè i ghe n'à dito una
Che sia vera,
Mi mo che per fortuna
Un certo canochial go al mio comando,
Che no ze tanto grando,
Ma con un per de lenti,
E chiare e cussì acute,
Che le cause motrici dei portenti
Co el se sà manizzar le trova tute,
Un canochial de merito,
Che m'à servido assae per el preterito
A far le osservazion
Co le quali me son
Nei misteri del cielo
Ridoto da cartelo,
E che, no ghe ze ingani,
Podendolo provar coi documenti,
De oltre quarant'ani
Da mi vien doparà tuti i mumenti;
Istromento che aposta ze stà fato
Da un mecanico inglese
Senza vardar a spese
Per un rico oltremodo e leterato,
Preziosi requisiti,
Che assae de raro i se combina uniti:
E per sola rason del gran decreto
Che ai miseri mortali
No ghe concede gnente de perfeto,
E in conseguenza gnanca i canochiali,
El mio dal tempo ga aquistà el difeto
Che ghe vol co me ocore
O de note o de zorno doparario
Dele grosse mezz'ore
Per montarlo,
Ma quando che l'è a segno,
Ossia co l'ò pusà sul cavaleto,
Me posso meter a qualunque impegno
Sicuro de l'efeto:
Mi, torno a dirlo, pien de cognizion,
E assistio a perfezion
Da sto istromento,
Tirando ogni mumento
Do ochi da falcheto,
Lassà go per progeto
Da una parte
El sol, venere, marte,
E mercurio e saturno e 'l somo giove,
E co regole nove
M'ò ocupà de la luna solamente
Seguitando el furor de la corente.
E sicome me so tegnù a giornata
D'ogni scoperta fata
A forza, i dise lori.
De dispendi e de stenti,
Dai nostri più valenti
Osservatori,
Ch'anca l'ano passà su la gazzeta
De quando in quando i ne n'à dà una feta,
Che, per spiegarme in modo figurato,
La podaria bastar
A qualunque più ingordo leterato,
Che ghe piase magnar
A boca piena
Per far marenda, per disnar e cena,
Cussì basà su le mie osservazion,
E sui mii risultati,
Che no sofre ecezion,
Li batizzo per mati,
Senza regola,
O sciochi, o visionari,
O tanti Belisari
Che no ghe vede fregola,
Avendone contà
Co una certa aparente verità,
E tolendone via
Come che se toria
I tangari che vien da le montagne,
No so po con che mira,
Dele vere lasagne,
Che pesava le picole una lira.
A mi, no gh'è ingarbugi, no gh'è impianti,
Per i ogeti astrusissimi del cielo
Bisogna che in giornata tutiquanti
I se cava el capelo,
E bisogna che i astronomi ignoranti
I se beva la garba col mastelo,
Se za co dago zoso la bacheta
No fasso da indovin, ma da profeta:
Per mi gnente ze sconto,
E senza mai falar
Posso sora la luna render conto,
Avendomela tanto avicinada
Che go podesto dar
Da per tute le parti
Una gran lanternada
Ai quatro quarti;
E al contrario de quelo che a l'azzardo,
A furia de ridicole induzion
Ga dito qualche astronomo bastardo,
Che a mi me ze permessa sta espression,
Dai mii studi indefessi e diligenti
Determino la luna che vedemo
Composta dei medesimi elementi
Che ze fata sta tera che abitemo.
Gh'è boschi, gh'è vulcani,
Gh'è monti, ghe ze piani,
Gh'è mari, ghe ze fiumi, gh'è torenti,
E la ze popolada de viventi
Fati come nualtri de presenza
Per materia e per forme,
E che per conseguenza
I magna, i beve, i dorme,
Avendoli natura previdente
Fornii come nu semo
De tuto l'ocorente;
I ga come che spesso nu gavemo
Panochie tanto fate,
I ga el formento e l'ua da far i vini,
I ga rave, fasioli, i ga patate,
E sorghi e cinquantini,
E legumi e foragi,
E fiori e fruti e erbagi,
I ga le so gran zuche, i so meloni,
Boni cristiani e gnochi in abondanza,
No dirò più de nu, perchè minchioni
Se tanti là i ghe n'à che ghe ne avanza,
Qua per quanto sia avara la campagna
Se ga sempre cucagna.
I ga pesci de tante qualità,
I ga i so bravi osei secondo i ani,
I ga razze de cani
Come qua,
Aseni, porchi, bechi, vache e bo,
Quanti nu ghe n'avemo no dirò,
Perchè sina da quando
La statistica ò fato
Me n'ò acorto che 'l numero ze grando,
E da un calcolo esato
Conoscendo
Che ogn'ano le famegie va crescendo,
Trovo per sta rason
Che se aumenta le bestie in proporzion.
Ze certo che anca là
Fiorisce arti e mistieri,
E che i ga dei bravissimi ingegneri,
Avendo rilevà
Che gh'è una quantità
De fabricati
Co del bon gusto fati;
Ghe ze stabilimenti,
Gh'è archi e monumenti,
Gh'è zoghi de balon,
Ghe ze le so preson
Per i furbazzi
Co tanto de caenazzi,
Co trombe e co resteli,
Ghe ze strade, gh'e ponti, gh'è fontane,
Gh'è palazzi, gh'è chiese e campanieli
Co le so gran campane,
Che ga, le me permeta,
Batochi de sta peta,
Gh'è bagni, gh'è teatri, gh'è ridoti,
Gh'è passegi, boteghe, gh'è casini,
Ghe ze le marionete, gh'è i casoti,
Ghe ze i so bei pestrini,
Furatole, locande,
Ghe ze le case grande
Per tuti quei putei
Che nasce a basa,
E no ga nena in casa,
Gh'è scuole, seminari, gh'è licei,
Gh'è le università per i studenti,
Ghe ze anca là i conventi,
Ghe ze i so siti sconti
Dove se paga a pronti,
E tanti de quei loghi
Dove finisce ogni pensier dei coghi.
Gh'è richi, gh'è pitochi,
Ghe ze 'l sanser da stochi,
Ghe ze storti dal dolo
A cazza del pandolo,
Gh'è prodighi, gh'è avari,
Gh'è ingenui, gh'è busiari,
Gh'è onesti, gh'è birbanti,
Ghe ze i so deliranti,
Gh'è i sbregai,
Che vol dir fortunai,
Ghe ze i so cagacasi,
Ghe ze i so papatasi,
Gh'è i nobili, i plebei,
I vodi, i cicisbei,
Penuria gh'è de doti,
Caterve de dindioti,
Gh'è sponze e licardini,
I buli, i moscardini
Che zira col baston,
Le zizole, i tromboni
Che crede parer bon
Co certi veladoni
Tre dei sora el zenochio,
E spera dar nel'ochio
E grazia a la persona
Coi mustachi sul muso a la schiaona
Come che ga ogni gato,
E questi ze'l ritrato,
Ze l'imagine vera
De tanti lasagnoni che gh'è in tera.
I ga i so cavadenti,
I ga chi fa brighieri,
I ga i medicamenti
E in conseguenza i medici e i spizieri,
Che vive da signori
A spale dei dolori,
E i ga, questi ze fati,
I so consalavesi e castragati.
Anca la ghe ze 'l sordo, ghe ze 'l muto,
Gh'è l'orbo, ghe ze 'l gobo, ghe ze 'l zoto,
Ghe ze 'l belo, el passabile, gh'è 'l bruto,
Gh'è quel che no pol spender un daoto,
E se trova anca là quel can da toro
Che pianze 'l morto, e che ze cargo d'oro.
Ghe ze anca là mercanti da carote,
Gh'è anca là la risorsa de far stochi,
Ghe ze chi se marida per la dote,
Ghe ze chi vive a spale dei marzochi,
Gh'è 'l fator che in t'un ano se dà stato,
E gh'è, Dio ne difenda, l'avocato.
Ghe ze anca là le lume col pavero,
Anca là gh'è più ludri che farali,
Anca là ghe ze i fioli del mistero,
Anca là gh'è buganze, ghe ze cali,
Ghe ze anca là el sangioto, gh'è la pizza,
E gh'è la coscrizion che fa la schizza.
Anca là gh'è la turba dei galanti,
Anca là chi va in scarpe e chi in stivali,
Anca là gh'è una strage de birbanti,
Anca là bia pagar le so prediali,
Anca là ghe 'l preterito perfeto,
E gh'è anca là le barche da tregheto.
Gh'è pistole, gh'è schiopi, gh'è canoni,
Gh'è chi sà far la regola del tre,
Ghe ze spade, danari, gh'è bastoni,
Ghe ze fante, cavalo, ghe ze re,
E in conseguenza gh'è la meneghela,
Che ghe svoda ai viziosi la scarsela.
Anca là i fa balar la marmotina,
Anca la tuti magna co la boca,
Ghe ze anca là la morte picinina,
Anca l'à gh'è 'l mistier de la maroca,
E se incontra anca là done per strada,
Che senza possession vive de intrada.
Ghe ze anca là le caneve de vin,
Gh'è sachi de formento e formenton,
Gh'è 'l so bravo formagio piasentin,
El so cafè col zucaro panon,
E gh'è sin, no le creda che minchiona,
I so salai co l'agio da Verona.
Gh'è spagnoli, gh'è inglesi, americani,
Gh'è russi, gh'è francesi,
Gh'è todeschi, italiani.
Gh'è persi, gh'è chinesi,
Gh'è greci, e no i ze privi
Gnanca de turchi e gusti relativi,
Anca là le galine fa el cocò,
L'aseno dise i o,
El galo avanti dì
Canta chichirichì,
Le oche invece cheo,
L'anare qua,
El quagio fa marmeo
E dopo squaquarà,
I gati ciga gnao, fa i cani bu,
I papagai discore come vu,
I muli tase e i trà,
Le cavre dise bee,
E tutiquanti fa
Quel che i fava in te l'arca de Noè:
L'omo secondo i mezzi e la so età
El lavora, el dispone
Tuto el zorno,
Ma per altro le done
Al contrario de qua
No le fa un corno,
Demodochè nissuna,
Che vive su sta tera,
Starave nela luna
Volentiera.
Anca là ghe ze piove, ghe ze venti,
Ghe ze neve, tempeste, gh'è sioni,
Gh'è teramoti e rote de torenti,
Gh'è saete, gh'è lampi, ghe ze toni,
Ghe ze fredo da far bater i denti,
Ghe ze caldo da oprimer i polmoni,
Gh'è calighi, gh'è brose e tuto quelo
De cativo e de bon che manda el cielo.
I ze dunque lassù
A quela condizion che semo nu
In sta vale del pianto,
E questa ze la prova più sonora,
Che sina nela luna ze stà spanto
El vaso scelerato de Pandora,
Val a dir che anca là risente l'omo
I tristi efeti generai dal pomo.
Dopo de ste pazienti osservazion,
Che tanto più go fato volentiera
Se cussì son venudo a cognizion,
Che influenza direta
Ga su la nostra tera
Quel pianeta,
Col favor de sta utile scoperta,
Ch'essendo più che certa
La ghe dà scacomato
A tanti e tanti
Sistemi stravaganti,
Che ze comparsi fora ogni qual trato
Da le balorde menti
De vari pretendenti
Sora ipotesi astrate e eronee basi
Senza gnanca saver cossa sia fasi,
Me son co le mie viste dedicà
Su l'antica question
Che i ga tanto e po tanto ventilà,
Ma che a so confusion
La ze ancora indecisa, se sto mondo
Sia sferico opur tondo,
E da un studio penoso e diligente,
Da estese e complicate operazion,
So al caso de concluder francamente
Che 'l mondo ga la forma d'un balon;
No i ze misteri,
E nu che lo abitemo
In conseguenza semo
Baloneri:
E za madre natura,
Che co soma bravura
E co mezzi indireti
La lassa qualche volta penetrar
Nei so secreti,
La ne lo fa provar
Se se va avanti
Coi ani a tutiquanti,
E un dato material a la lontana
In te la spezie umana
La lo presenta quando
Se vada co criterio esaminando,
Perchè fra tanta zente
Ze 'l numero dei tondi prevalente.
Drio de sta interessante erudizion,
Che no gh'è oposizion
Chi fa un presagio
Ga el nonanta per cento de vantagio,
Per scriver quel de l'ano trentasete
Me so sentà a taolin
Co la mia quiete,
E m'ò tirà vicin
I libri matematici,
Le carte che determina
E gradi e longitudini,
Le machine de fisica,
I spechi col riverbero,
I recipienti idraulici,
I condutori eletriei,
Le trombe de l'idrogeno,
Le lamine cilindriche,
Le tavole su l'iride,
I mecanismi d'otica,
I piani de prospetica,
La mia famosa bussola,
Le square, i quadrilateri,
L'elitiche, i triangoli,
Le latole magnetiche,
I tubi diaforetici,
I segni del zodiaco,
La descrizion dei tropici,
Le calamite, i pendoli,
I prismi grandi e picoli,
Le sfere, i telescopi,
El canochial elastico,
La mia bacheta magica,
El mio compasso a susta,
E tuta la gran busta
Dei stromenti,
Che in sti dificilissimi argomenti,
Chi desidera far bona figura,
De torseli per man bia che 'l procura,
E chiamando a capitolo i pensieri
Fora de quel mumento de magnar
No go fato altro fin che calcolar
Do mesi intieri,
Convinto come son
Da l'esperienza
Che coi conti se ariva a perfezion
In ogni scienza,
Avendo trovà scrito
In t'un libro latin
De un certo Pesavento fiorentin,
Molto erudito,
Che cola sola regola del tre
Ga savesto Noè
Quanti goti de aqua ze cascà
In quei quaranta dì che à scravazzà.
Seguitando quei metodi minchioni
Ai quali vedo tuti che se adata,
Plagiari dei schiesoni,
Anca mi co una longa schicarata,
Se gavesse bisogno, savaria
Sul trentasete far la profezia,
E podarave dir
Una gran filastroca de insensae
Col scopo de impenir
Varie fazzae,
Ma mi che no coltivo
El misero progeto
De conseguir sto efeto
Quando scrivo,
Non avendo altro fin precisamente
Senon quel de predir cosse sicure,
Aciò tuta la zente
A tempo possa tor le so misure,
E confermar la publica opinion
A le mie predizion
Co materia che sia
In modo conveniente digeria
Per darghela in tel muso
A vari che me invidia e me gà suso,
Perchè i pretendarave,
Dormindo come tassi
Tante note che mi buto le bave
Tra la sfera, la bussola, i compassi,
Aver fama de astronomi valenti,
Per le bele scoperte
Che i fa senza bisogno de le lenti,
Longhi destesi soto le coverte
Arente la muger che li descola,
Quando invece la mia la dorme sola.
Mi che, lassando i scherzi da una parte,
Son peritus in arte,
E che fra i leterati no voi posto
Perchè l'è fumo, e mi ghe tendo al rosto,
Senza pompa d'estese erudizion,
E senza entrar in certe digression,
Che dita a la parola
Ve rompe 'l cesto s'anca el ze de tola,
E un'aca no le val,
Me ocuparò de l'ano in general
Fando su le stagion nel mio presagio
Quatro sole parole de passagio.
L'inverno sarà breve,
El fredo moderato,
Su le montagne cascarà la neve,
Ma la pianura sarà esente afato;
No supiarà la bora, nè i sirochi,
Che fa i zenochi a tochi,
No vegnarà calighi a importunar,
E con un gusto mato dapertuto
Se podarà zirar
Sempre col suto
Sia la note che 'l dì
Senza buganze ai pì;
Le stue de raro assae
Se tegnarà impizzae,
Un ozio ghe sarà per le manizze,
Un bando a le pehzze,
Vacanza per le ombrele,
Risparmio de fanele,
El qual compensarà
Tanto consumo ingrato
Che i medici ga fato
Tuto l'ano passà
Matina e sera
Per causa del cholera:
L'inverno sarà infati cussì bon
Da lassar che se vada
Tanti zorni in velada
O in veladon,
A grado tal che 'l mese de febraro
Se podarà el tabaro,
Se podarà el gaban,
Mandarli in guardaroba a san Cassan;
E za qualche galante,
Che no vol certi intrighi, e no ze sempio,
El ne darà zelante
El bon esempio.
Se gavarà i so fruti de stagion,
Ossia rave e maroni
A bataglioni,
Mandole e fighi sechi dei milioni,
Diluvio de carobe e de susini,
Nose, stracaganasse e brustolini.
Sarà la primavera
Tepida tuto el dì, fresca la sera;
I albori e le piante
Se vedarà abonora
Le foge a butar fora
Tutequante,
E i verdi coli, i prai
A diversi colori
Sarà presto smaltai
D'erbe e de fiori;
Le campagne ridenti
Sperar le ne farà
Una gran quantità
D'ua, de formenti;
Nei campi, fra le ciese e nei boscheti
Se sentirà i oseleti
Contenti a far l'amor,
E cantarà nei broli
I merli, i russignoli
A ralegrarne 'l cuor;
Sarà folti i giardini,
E variopinti
De viole, zensamini,
De pulcre, de giacinti,
De tulipani e rose,
E d'erbete odorose;
Andarà via zornae
Serene e bele,
E note da le stele
Brilantae;
In mezzo al firmamento
Risplendarà la lima,
E la farà d'argento
La laguna;
Un'aria spirarà costante e pura,
E in ogni sito ridarà natura.
Gavaremo un istà dei più beati
Con caldi moderati
Senza quela secada
De doverse sentir do mesi atorno
La camisa petada
Tuto el zorno;
El tempo squasi sempre sarà bon,
La note chiaro,
Capitarà de raro
El lampo e 'l ton;
No vegnarà tempeste a rovinar
La roba da magnar,
No refoli de vento, e solamente
A dar la sventolada
Per mantegnir un caldo soferente
Farà la garbinada;
No ghe sarà mossati, che ve seca
Tuta quanta la note
Co quele so vilote,
E che ve beca;
No pulesi groteschi,
Che basta uno in braghesse per star freschi;
Nè se andarà sogeti
A tanti e tanti inseti,
Che dala providenza
I par messi a sto mondo solamente
Per obligar la zente
A un continuo esercizio de pazienza;
Per tuto ghe sarà
Una gran quantità
De bisi, de articiochi,
De sparesi, de fragole e salate,
De zuchete, sariese e peri gnochi,
De corneti, fasioli, de patate,
E copia de naranze e de limoni
Tuti pieni de sugo e tuti boni.
Se gavarà un autuno veramente,
Che senza esagerar,
Se podarà chiamar
Nel'estension del termine ecelente;
Zornae se godara
Da no invidiar l'istà;
Note de quele
Da numerar le stele;
La brosa dela sera
Ne bagnarà la tera,
De raro piovarà,
E squasi sempre 'l cielo
El se presentarà
Lucido e belo.
Feconda oltre misura
Sto ano la natura
La ne darà un racolto
De ua, foragi e grani,
Che bastarà dies'ani
A no dir molto:
No ghe sarà locali sulieienli
Per meter i formenti,
El sorgo, el cinquantin,
Nè arnasi quanti basta per el vin,
E starà a ciel seren
Le montagne de fien;
Capitarà a peate
I caurli e fiori, i brocoli romani,
I capuzzi, le verze tanto fate,
I fonghi del Montelo beli e sani,
Cardi, sponzioli, roscani noveli,
E seleni e carote e ravaneli,
Ma la gran abondanza
La ghe sarà in sostanza
Nele zizole grosse e nele zuche,
Sia sante che baruche,
Nei pomi morosini,
In tei boni cristiani, in tei meloni,
E dal manego grando e rampeghini,
Da darghe el muso drento
Da per tuti i cantoni
Ogni mumento,
Perchè nel clima nostro l'è ridoto
Superior al bisogno sto prodoto.
Oltre la gran cucagna
Classica, prodigiosan
De quel che soministra la campagna
Se gavarà copiosa
Quantità de carname,
Diluvio de polame,
Ma vedeli, ma dindi esenzialmente
Da stomegar la zente,
Cussichè
De tante gran famegie che ghe ze,
Se stentarà a trovarghene, credelo,
Che sia senza del dindio o del vedelo.
Infinità de osei geutili e grossi,
Da spanzarse co pochi carantani,
Lodole, becafighi, petirossi,
Gran pernise, cotorni, gran fasani,
E tordi e becanoti e becanele,
Parussole novele
Da stufar,
Da poderle chiapar
Sin col capelo;
Salvadego un flagelo,
Pignole, chiossi, mazzori, sforzane,
E foleghe una strage e tute sane.
Pesce picolo e grando
Tanto ghe n'avaremo,
Che qualche volta i barcarioi vogando
Lo coparà col remo;
Sievoli, orae, barboni,
Sardele, go da late, passarini,
Scampi, sfogi, sturioni,
E rombi e trie, baracole, branzini,
Scombri, volpine, asià,
Ton, astesi, dentali,
Moli un infinità,
E gran sepe e bisati femenali.
Le case de comercio fiorirà
Per la gran quantità
De cambi e de barati,
De imprese, de contrati,
A grado che se penarà a trovar
Chi se adata a imprestar
In qualunque mumento
Al sessanta per cento,
Quando che qualche amigo no gavessi,
Opur che no intivessi
In t'un omo cristian,
In t'un benefator,
El qual col pegno in man
No ghe regesse 'l cuor
De alterar la misura consueta
Per no agravar la zente,
E seguitasse a dar la so moneta
A un quaranta per cento solamente.
A basa, a bomarcà,
Tuto se trovarà,
Ma sora d'ogni cossa i rasadori,
Perchè se la va avanti
Presto saremo tanti
Guastadori,
E qualche zovenoto
Un deciso simioto.
Vegnarà fora mode stravaganti
In tute le stagion,
Che tegnarà la turba dei galanti
In t'una staordinaria ocupazion,
Se trovarà a bon pato tuto l'ano
Sede, cambrichi, tele,
El casimir, el pano,
Le lane, le fanele,
Che da qualche mercante de conscienza,
Dei quali ghe n'è molti in sto paese,
Se comprarà in credenza
A un tanto al mese,
No metendo de rosto
Che do soldi per lira sora el costo.
Gavaremo passeggi frequentai,
Boteghe sempre piene,
Vilegiature alegre quanto mai,
Pranzi de compagnia, marende, cene;
Teatri dove l'ore de la sera
Podaremo passarle volentiera;
Perchè i tratenimenti
Sarà tuto al roverso dei presenti;
Spetacoli completi,
Compagnie de famosi comedianti,
Musica de maestri i più proveti,
Bravissimi cantanti,
Fra i quali dele done de valenza,
Che a Venezia e a Milan
Farà che da l'udienza
Sia scordada la quondam Malibran,
Che qua col so gargato
E qualch'altro secreto
Un grandissimo efeto
La ga fato.
Aventure amorose a marteleto,
Anedoti galanti che darà
Serio sogeto,
Più de le novità,
De gran ocupazion
Per le conversazion
Indove co i li conta
Se trova sempre l'omo del mistier,
Che megio d'un becher
Ghe dà la zonta,
E ghe ze certe sponze che no bagna,
Che le rancura e dopo le sparpagna.
Gran matrimoni d'ogni condizion
In tute le stagion,
E nassarà putei
Grossi come porcei,
Forti robusti e sani,
E pieni de rigor
Da poder far l'amor
Sin de otant'ani.
Tuto andarà benon,
Piani, speculazion,
Nè mancarà risorse
A sussidiar le borse
De l'avaro, del roto,
E favorio dal loto
Se vedarà anca el mato,
Che ga perso el so stato,
Le braghe, la velada,
E tante gran donete,
Che per viver de intrada
Le rischia a la fortuna el disisete.
Le malatie per tuto sarà rare,
E no se sentirà che idropisie,
Che vegnarà guarie
Da le comare:
Un ano in conclusion
Belo in maniera e bon
Da far tuti stupir,
Ano che forsi el mondo
El dovarà finir
Senza el secondo;
E che la sia cussì
Ve l'assicuro mi,
Mi, che co dago zoso la bacheta
No fasso da indovin, ma da profeta.