Quando
|
Edission original: |
Antonio Negri, In gondoleta, Barcarole e rime veneziane, Milano, Carlo Aliprandi, 1895 |
|
Fonte: |
| ← Ricordi | Edission e fonte ▼ | Rondinele → |
Quando, Nineta mia, quando saremo
Do veci bianchi, sechi, sdentegai,1
Forse 'l tempo passà ne scordaremo
4Quando s'avemo tanto idolatrai.
No capiremo più come in tel cuor
Ghe sia sta in te quei tempi tanto amor,
No capiremo più, Nina, più mai,
8Quanti basi fra nu si sta scambiai.
No ricordando più, Nina, l'afeto
Che tuti do 'na volta s'à sentio,
Se trovaremo el desiderio in peto
12De riadorar el nostro vecio Dio.
Alzaremo la sbezzola,2 e slongando3
El colo e i lavri se 'ndarà çercando
Se tra le rughe mai, per qualche caso,
16Ghe fusse el logo adato per un baso.
E quando po, ne l'estasi beata
De un baso riuniremo i veci cuori,
Ricordaremo ben la vita mata
20Gioconda e dolçe de quei nostri amori.
Se vedaremo zoveni e fiorenti,
Ritrovaremo i za scordadi açenti,
E ne l'estasi dolçe, Nina, 'scolta,
24Se adoraremo, cara, un'altra volta.