Ricordi
|
Edission original: |
Antonio Negri, In gondoleta, Barcarole e rime veneziane, Milano, Carlo Aliprandi, 1895 |
|
Fonte: |
| ← Samarco | Edission e fonte ▼ | Quando → |
A l'amigo Vincenzo Tosi.
Ti te ricordi, Cencio mio, le sere
Passae su la laguna
A contemplar el çiel per ore intiere
4Al ciaro de la luna?
Poeti tuti do, fantasticando,
Pensando a la morosa,1
A la luna se 'ndava domandando
8La vena spiritosa
Perchè i nostri verseti andasse subito
Driti a tocar el cuor
Dei nostri anzoli biondi, che insensibili
12Restava al nostro amor.
Che parole detava a le nostre aneme
La gran Çità lontana
Che sluseva a fior d'aqua, nel so' fassino
16D'orïental sultana!
Lontani assae da ela e squasi persi
De la laguna in fondo,
Se se godeva a declamar dei versi
20Là zo, fora del mondo.
Ne la pase del mar, nel gran silenzio
Del çiel seren, d'arzento,
La fantasia ai nostri cari anzoli
24Coreva ogni momento.
La malatia de l'isolan2 vegneva
Alora ai nostri cuori....
A la Çità tornar nu se voleva,
28Più 'rente3 ai nostri amori,
E alora, aviçinandose a l'incanto
De la Venezia bela,
Amor e amirazion univa el canto
32Per inegiar a ela,
E per un momentin dei nostri anzoli
Se se desmentegava,
Davanti a la Çità d'arte miracolo
36Che 'l cuor ne entusiasmava.