Ritrato de dona Cate
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Per el batizzo del primogenito de do sposi | Edission e fonte ▼ | A dona Cate che ga schivà l'ocasion → |
PER
No gh'è gnente da dir,
Bisogna convenir,
Che ze Catina
Un'opera divina
5Co massima bravura
Composta da natura,
E po mandada fora
Per far che mi l'adora;
Cavei foltissimi
10Color castagni,
Ochi che fulmina
Senza i compagni,
Che drento bisega
Proprio del cuor,
15Veri telegrafi
Del dio d'amor;
Cegie de un'indole,
Dolce e graziosa,
Ma formidabili
20Se la le incrosa;
Lavrì de porpora,
Che tal e qual
Do tochi a vederli
Par de coral;
25Dentini candidi,
E tuti eguali,
Come scieltissime
Perle orientali;
Boca col zucaro,
30Che, no gh'è caso,
Vien de stroparghela
Vogia co un baso;
Un per de fossole
Su le papote,
35Dove le Grazie
Furbe e galiote,
Drento scondendose
Quele busete,
Le inzuca i omeni
40Fando baosete,
E Dio delibera
Se ghe dè drio,
No la se scapola,
Vu sè servio;
45Naseto classico
Ben colocà
De greca sagoma
E rebecà,
Ma in grado minimo,
50Tanto modesto,
Che acresce el merito
De tuto el resto;
Peto da Venere,
Che se 'l se toca
55Da suso el refolo,
Vien l'aqua in boca;
Parlo, credemelo
No l'è busia,
No za per pratica
60Ma per teoria;
Fianchi de un genere,
Che 'l dio tiran
Arditi i muscoli
Fa de le man,
65Ma no gh'è un'anima
Che l'avicina,
Ze una Penelope
Siora Catina,
Tantochè se la trova l'indiscreto,
70Se la incontra l'ardito, l'imprudente,
Che se azzarda mostrarghe de l'afeto,
El ze servio che no ve digo gnente,
E in sta parte purtropo, ve lo zuro,
Go qualche dato, ma che ze sicuro.
75La ga po sta creatura
Graziosa la figura,
Le parti tute esate,
Le carne puro late,
Carissime manine
80Pienote e molesine,
Penini da putela,
Streta de vita e snela,
Maniere insinuanti.
Aspeto seducente,
85Che piase a tutiquanti,
Ma a mi po specialmente,
Un estro, un portamento,
Che svegia el sentimento,
E che faria a boconi
90El cuor sin dei Neroni,
Movendo el pensier pronto
A quelo che stà sconto,
Dove, fatalità! continuamente
Me conduse la mente.
95Infati, lo ripeto.
Ze Catina
Un essere perfeto,
Un'opera divina,
Che saria fata aposta per modelo,
100Ma che ga sul so cuor tanto de pelo.