Per el batizzo del primogenito de do sposi
che se batizza el primogenito
de do sposi
|
1857-58
|
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Per l'album de la contessa Aneta | Edission e fonte ▼ | Ritrato de dona Cate → |
Sta matina iscaturio
Va da Venere so fio,
E ghe dise; — el muso drento
Za un mumento
5Mi go dà
A un amabile putelo
Malapena batizzà,
Caro tanto e tanto belo,
Che qualunque lo vardava
10Lo trovava,
Questo è un fato,
De presenza el mio ritrato;
Tantochè sin che l'è picolo
No ghe ze nissun pericolo,
15Ma ze facile che quando
El sarà venudo grando
El me porta via el paneto
E che alora sia costreto,
Dopo tanto che ò strussià,
20De cercar la carità,
Perchè a dirla ingenuamente
Se i me tol sto ministero
Resto un vero
Bon da gnente,
25Per aver, dachè son nato,
A sto mondo
Sempre fato
El vagabondo.
Aciò el caso no suceda
30De ridurme miserabile,
Presso Giove la interceda
Che sia messo in pianta stabile;
Za per ela, mi lo sò,
E sò anca la rason,
35No l'è bon
De dir de no; —
Ma so mare navegada
Ghe risponde a sta filada: -
Sì ze vero, sò anca mi,
40Sò anca mi che quel putelo
El ze belo
Quanto ti,
Ma stà pur col to cuor quieto,
Nol te porta via el paneto,
45Sta pur quieto perchè lu
Cressarà sora la tera
Un modelo de virtù,
Imitando in sta maniera
I bei numeri che ga
50La so mama e 'l so papà,
Quando tuto a rincontrano
Al to posto necessario
Sarà sempre, te protesto,
Sin che 'l mondo cussì dura,
55Tuto altro che l'onesto,
Che 'l faria trista figura.