Santa Lussia (Vittorio Vitturi)

by Vittorio Vitturi

3 Santa Lussia Strade e vicoli Du ladri Nadal Vittorio Vitturi 1907 XX Poesie veronese

Indice:Strade e vicoli.djvu

Vittorio Vitturi ―  Strade e vicoli

Santa Lussia

1907

Edission original:	Vittorio Vitturi, Strade e vicoli, Rime veronesi, Verona, Fratelli Drucker editori, 1907
Fonte:	Indice:Strade e vicoli.djvu

←  Du ladri

Edission e fonte ▼

Nadal  →

S.ª LUSSIA

I.º

Fra mama e fioleto

     — Oh, mama, mama, quante cose bele
Che ò visto su i bancheti de la Brà:
Cavai, puöti,¹ trombe, carossele,
E ferovie mecaniche che va.

     Gh'è barche e vaporeti con le vele,
Elmi, s-ciopeti, e spade da soldà,
Cavai da cuna² con le brie³ e le sele:
Po’ fruti e mandolato, che se sa....

     — Salta in nana,⁴ tesoro, soto al caldo:
Quanta roba doman!... Eco che i vien,
Santa Lussia l’è quà col so castaldo... —

     — Ma no desmentegarte⁵ mama, no,
De quel putin malà del pian teren....
Che ci l’è Santa Lussia, za lo so!

II.º

Fra amighe

     — Dal bon⁶ che el to moroso el t'à lassado?⁷
E con che scusa, dime, cara ti:
No ’l t'avarà piantado miga lì,
Un qualche imbroio l’avarà trovado! —

     — Oh, in quel momento l’avaria magnado!
Dopo quatr’ani el dise, sonti mi?⁸
Che so pare no vol, che mi, che ti,....
Che lassa far al tempo: sto massado!

     E intanto ò perso i ani a far la mufa,⁹
È son sta brava se ò portà passiensa:
Uh, se lo trovo nasse ’na baruta!

     — Vuto saver¹⁰ la causa del to mal?
Ci me lo dise a mi, che g'ò spariensa,¹¹
L’è par no farte el solito regal!

III.

Fra sposeti.

     — Va là, dimelo, Gigi, el regaleto
Che te me fe,¹² elo belo? Uh, segreton!
Va là, Gigi, Gigeto, fa da bon,
Se no, no te si più el me bel moreto. —

     — Doman matina, ’pena su dal leto,
Te çigarè:¹³ Che bel santalussion!
L’è el re de i regaleti, l’è un campion,
Te digo mi che ’l val un tesoreto....

     — To’ ciapa un baso; mi l’ò sempre dito
Che son sta fortunada de sposarte.....
— E ti me fetu gnente? — Adesso sito!¹⁴ —

     — Dime... — Ma in te la recia, vegni quà:
L’ è ’l più caro regal che posso farte;
Un bel puotin de quei che canta ohà!

---

Note

1. [p. 102]Puoti: fantocci
2. [p. 102]cavai da cuna: cavalli a bilico
3. [p. 102]brie: briglie
4. [p. 102]nana: letto
5. [p. 102]desmentegarte: dimenticarti.
6. [p. 102]Dal bon: davvero
7. [p. 102]lassado: lasciato
8. [p. 102]sonti mi? so io?
9. [p. 102]a far la mufa: ammuffire
10. [p. 102]vuto saver: vuoi sapere
11. [p. 102]spariensa: esperienza.
12. [p. 102]Fe: fai
13. [p. 102]çigarè: urlerai
14. [p. 102]sito! zitto!