Scherzo per Nozze
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte prima, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 1.djvu |
| ← I Caraguoi | Edission e fonte ▼ | El Galante Romantico → |
Mia nona Vittoria
De bona memoria
La gera una dona
Tagiada alla bona,
Ma piena de spirito
Un libro stampà....
Curioso sto anedoto
M'ha un zorno contà.
De Psiche invaghido
L'orbetto Cupido
De farghene acquisto,
La forma l'ha visto,
Volendo che Zefiro
So primo corrier,
Del ladro da femene
Facesse el mestier.
Chi fosse sta bella
Divina putella
In largo me butto
Se vogio dir tutto:
Scolteme, se vedarla
Sposina volè,
Vu al specchio mettendove
Sta putta trovė.
In siti beati
Tra un spasso da mati,
Da Zefiro stada
Xe Psiche logada:
De dì no mostrandose,
Amor, co grazietta
De notte sta vergine
Lu ha fatto donetta.
In ogni occorrenza
Servìa de presenza
În mezzo aí diletti
Più veri, e perfetti,
Chi stuffa mai credarla
Podea de quel ben?....
Sentì quella fregola
Che drio mo ghe vien.
Amor diligente
Facea solamente
De notte ritorno
Al caro soggiorno,
E sempre invisibile
Per ella restà,
A Psiche sto metodo
L'avea precettà.
La smania più fiera
De vedar chi el giera,
Crescendoghe in petto
La porta al dispetto,
E par d'impossibile
Nogioso che vien,
Sposina capimosse
Qualunque entretien.
No ghe più dolcezze
No val più carezze,
Bizzari pensieri
La fa a centeneri,
E ghe chi la stimola
A credar ancora,
Che un mostro terribile
Sia quel ch'ella adora.
Diseghe a una tosa
Sta cossa gustosa
Se in aria alla presta
Volè la so testa;.
Diseghe ch'el diavolo
La gà per mario,
Allora credemelo
Xe tutto finio.
Co tanta amarezza
In tanta incertezza,
La studia la forma,
La spetta ch'el dorma,
La vol senza remora
Conossar chi l'è.......
Riflessi xe inutili......
Sta smania ghe xe.
Za tolta a pianetto
Dal sposo, e dal letto,
Col lume, e una spada
In man preparada,
Tremando de vedarse
Un mostro marido,
Oh dio quanto giubilo!
La vede Cupido.
La basa esultante
Quel tenaro amante,
Za in cuor signoreggia,
Amor, maraveggia,
E mentre che prodiga
La xe de carezze,
Un deo la và a ponzarse
Sta fia nelle frezze.
Allora nel petto
Più cresce l'affetto,
Là triplica i vivi
Basetti espressivi,
Ma oh dio della fiaccola
Cascando el stupin,
Un fianco se brustola
Cupido meschin.
Svegià sul momento
Da sto complimento,
Vedendo in effetto,
Tradido el precetto,
De Psiche lagnandose,
Sto sposo infurià,
No val più le lagreme
Nol resta più là.
E za inutilmente
Sta sposa dolente
Mettendose a lutto
Lo cerca per tutto.....
Amor spesso facile
Xe in odio cambià,
Per cosse anca piccole
Co l'è disgustà;
Da stella maligna
Condotta a Ciprigna,
Per causa lontana
So fiera tirana,
Fingendo d'assisterla
L'ha fatto desìo
E senza el ricupero
Del perso mario.
Finchè raddolcido
Nei sdegni Cupido,
Ga piasso da morte
Salvar la consorte,
Che stanca, e za prossima
All'onda Letal,
Co un giozzo de netare
Lu ha fatto immortal.
De tutta sta istoria
Mia nona Vittoria,
Ma messo ella al fato
Infin da tosato,
Ma mi troppo zovene
No avea da capir,
Che cossa l'anedoto
Volesse po dir.
Più volte disendo
Sto caso stupendo,
A quelli mi andava,
Coi quali studiava,
A putti de spirito
Piuttosto meschin,
Coi quali sbregavimo
Un dì el calepin.
A questo, e a quell'altro,
O cuco, più scaltro,
Col dirla frequente
Per poco, o per gnente,
Alfin fra sti zoveni
Trovà go quel tal,
Che ga de proposito
Zontà la moral.
Sto fio de bon senso
Filosofo immenso,
In picciolo trato
Capir lu m'ha fato,
Ch'el troppo saverghene
Felici no fa,
Ch'el caso benissimo
Più volte s'ha dà;
Che tolto ogni velo
Amor no è più quelo,
E cambia in tormento
Qualunque contento,
Se mai Dio ne liberi,
Bandia l'illusion,
Se vol d'ogni effetto
Studiar la rason.
In tutto el complesso
M'ha piasso el riflesso
Formà veramente
Dal putto sapiente,
E al caso po in seguito
M'ho spesso catà,
E vere verissime
Ste cosse ho trovà.
Per chi vol star quieti
Xe questi i preceti:
No i xe per do sposi
Ardenti, e amorosi,
Ma el tempo che facile
Sa tutto cambiar,
Li pol utilissimi
Ai casi adatar.
E allora, oh che gloria
Mia nona Vittoria,
Se in pratica messi
Vien mai sti riflessi!
Li calcolo inutili,
Ma el ponto s'el vien
De Psiche all'istorico
Penseghe su ben.