Seminarium
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Aegri somnia | Edission e fonte ▼ | Me digo de no → |
.jpg)
Hoc itaque cognoverunt quod felicius ignorarent.
S. August. De Civ. Dei. XIV, 17.
EH! capisso! Co' giera in Seminario
Che se studiava per passar i esami,
Gò imparà tutto quanto el necessario
E so anca come se fa i salami,
Che ghe poràve dir, benchè in somario,
Come el cocòn se peta nei botami,
Benchè le done, gnanca in fantasia,
No gàbia mai tentà l'anema mia.
Ma el Seminario! Co' lo vedo in sogno,
Me desmissio in sudor coi cavei driti,
Perchè dentro de mi me ne vergogno
Pezo d'un scelerà pien de deliti.
Mi no ve conto e no ghe n'è bisogno,
Quel che ghe impara i povari leviti
E le diavolerie che fa el demonio,
Dato che sarìa parte e testimonio.
Ma gò in memoria quele negre stanze
Dove ne confinava i superiori,
Pieni de fredo e sgionfi de buganze,
A studiar Sant'Alfonso dei Liguori;
Che se magnava do codeghe ranze
E fasiòi petulanti e traditori,
Soto un lumin da ogio che impestava
Fina le letanìe che se cantava.
Che zorni longhi! E co' vegniva el scuro
Umido e sepolcral che ancor lo vedo,
Inzenocià per tera, arente al muro,
Mi taconava un pater, ave e credo;
E sul pagiazzo lendenoso e duro
Me stendeva a tremar de fame e fredo,
Che sa solo el Signor come gò pianto
Spetando el zorno che tardava tanto!
E son sta per tanti ani a sta maniera
A digerirme vespri e matutini,
Studiando i Padri da matina a sera
E confondendo i greci coi latini;
Serà int'una preson dove ghe giera
Una spuzza che gnanca i pelegrini;
E fin d'alora in gabia, che la sorte
La me vol carzarà fino a la morte.
Ma adesso, cari fioi, no xe più i tristi
Tempi de quela austerità ecclesiastica
E sti moderni de seminaristi
I me vien in braghète a far ginastica.
I xe tuti muriani e democristi,
I gà de drìo i tratati de scolastica
E presto i mostrarà le sacre polpe
Al futbàll o a la cazza de la volpe.
Xe el progresso, putei, che za se sente
Da tanti segni che se volta el vento,
Che se cambia la testa de la zente
E che tarderà poco el cambiamento.
Solo per mi no cambiarà mai gnente,
Sempre serà in preson, sempre qua drento,
Sorvegià, tribulà, ligà, deriso,
Fin ch'el Signor me toga in Paradiso!
Xe el progresso! Doman i Cardinali
Vegnarà co la pipa in Concistoro,
I frati scalzi portarà i stivali
Le tonaghe sarà d'arzento e d'oro;
No se dirà più messe ai funerali,
Le suore zigarà «pane e lavoro!»
E i zocolanti nel so monastero,
Nominarà Prior... la bela Otero.