Siè cantè sora la villa/Cantà II
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Cantà I | Edission e fonte ▼ | Cantà III → |
E Gnente manco della libertà
Alla vita dell'Homo è neccessaria,
El godro, e mantegnir la Sanità,
E far senza quell'arte che zavaria
Del Medego, e Special, che in verità
Na scenzia se pol dir de pontinaria;
Orbade tutte quante el so operar,
Rabichi, scherebizzi el so parlar.
No credo che dirì che diga mal,
A dir che la natura a conservarse
La tende, e mantegnerse in cavedal
De Sanità, che questa all'Homo parse
El so segondo ben, e gnente val
Chigo senza de questa, o bone o scarse
Sia pur le spese, tutto ne fà prò
Che 'l sia cotto in tel acqua, o in tel bon brò.
Chi dirà mai che l'aria de Città,
Che 'l vivro de bocconi pì leccardi,
De robba sempro bona, e ben conzà
Ne possa confervar sani, e gagiardi?
Quando s'avem da dir la verità,
O che semo legitimi, o bastardi
Del Padre Damo, e se sà che 'l vivea
De quel che la natura ghe sporzea.
Gne sguatari, gne coghi, e sbrodegoni
Per farghe da magnar tegneva in casa,
Ma de bestiame, ed erbe, e frutti boni
Vivea, senza guardar piasa, o no piasa,
Tutto era bon, tutti preziosi doni
Della natura, e adesso no ghè casa
Ch'agni dì no se voggia onzer la gola,
E del bon, e megioro aver in tola.
Dio guarda s'ogni dì sti Cittadini,
No i lecchesse piatanze scontrafatte,
E se le Donne certi magnarini
No le ghe fesse; ma ste Donne matte
Se no le avesse i so fegondi fini,
No le dovarea far tante pignatte,
Perchè ne fà pì pro fave che dura
Che n'è el capon a quel che se l'ingura.
Onde sto vivro digo mi d'adesso
Che costuma de far i Cittadini,
Con tanti piatti, sempro rosto, e lesso;
E quello che sol far i contadini
Che de polenta, e senza sal ben spesso
Bosogna che la femo da meschini.
Come mai se pol dir che la natura
Madre anguala de tutti abbia la cura.
Se in quei la vol e no la se contenta,
Se no de robba scielta, e pì squesita,
E a mi mesura el pan, e la polenta
Conza col revo, e la ghe và de vita,
El Cittadin la fame mai nol tenta,
Nu pì d'un meso la ne monze, e zita.
O che diversa pasta l'è la soa,
O che loro è la testa, e nù la coa.
Sia però con se vol in carrezà
Voi tornar col discorso, e ve dirò
Che quel magnar che s'usa in la Città
L'è contra la natura, el provarò
Che l'è nemigo della sanità,
Perchè tante piattanze lecchè an pò,
No le serve che a far na confusion
De humori e de cattari in tel magon.
E così sto magnar sibben l'è al verso
De sti golosi, e tanto i lo petisce,
De quando in quando i ha el buel roverso,
O fa star mal, o presto el li fenisce;
Ma el nostro vivro in tutto al soo diverso
Ne azzala alle fadighe, anzi patisce
El Villan quand'el và dal so patron,
E per disgrazia el magna un bon boccon.
Che se dirà della vita che fà
El Cittadin col far de notte dì
Col star in letto fin nona sonà,
E nar in letto a mezza notte, e pì?
Quel star a tola dopo aver disnà
Impoltronè, quel nar de chì, e de lí
Sempro in tripudio, e così star al sogo
I dì d'Inverno, o a taolin sul zogo.
Così che se dirà della gran moda
De broarse ogni zorno le buelle
Con Caffè, Cicolate, e tanta broda
Inventà per far lissia alle scarselle?
Pur no ghè logo donve pì se goda
Per rider, e dar spazzo alle novelle,
Credio che Damo, Noche, e che Noè
I se slongasse i anni col Caffè.
Dio guarda; e gnanca no s'usava allora
Tante purghe, gne tante medesine
Che i stomeghi desconza, e i tra in mallora,
Gne ghera sti Barbado, e Pollachine,
Gne sti sorbeti, ne s'havea gnancora
Cattà ste droghe barbare, e sassine
De trar l'Homo de mal, e col pretesto
D'imbalsemarlo, farlo morir presto.
Perchè al tempo d'ancò per le Cittè
De Medeghi ghe n'è na procession
Agni tri passi un Medegho incontrè
E tutto quanto l'anno i è in fonzion,
Como se le Cittè fusse impestè
Da giandusse e malani agni stagion,
Ma per el pì la fantasia stravolta
Fa tutti i tempi andar Medeghi in volta.
Chigo de sora se na Villa catta
Un Medego, per trenta Ville el fà,
Che 'l sia po n'Homo brao, o na zavatta,
O poco, o squasi mai l'è recercà,
Perchè se per disgrazia no s'imbatta
Che sia quarche Villan grasso ammalà,
El lo farà chiamar per no parer
De voler sparagnar, o no poder.
Per altro como che corre punion,
Che 'l Villan no ghe n'ha da buttar via
Se 'l se mala el fà farse un beveron
De orbeghe, senza nar a Speciaria,
Agni mal se batteza per paron,
No ghè restagni, preuli, o pocondria,
Tutto è fratto, strachezza, e carne greva,
Recipe na gran zuppa, e che se beva.
Se i se accorze dal freddo aver la fevra
Quattordese gabbane i se tra addosso,
Na suppa in tel vin grosso, e i se la impevra
Ben sù, perchè la ghe desgiara el gosso,
Se ghe ven le pettechie como levra
Le ghe dà fora, e i suda fin su 'l osso,
E in dù trì di o che i creppa, o che succede
Che i leva sù, i và in volta, i zappa, i mede.
La mocarola serve per purganti,
Per china o frassinel, o ciresara,
Levamento e bogoni, i vesiganti,
Per la dogia la fel de porco amara,
E senza tante visite, gne tanti
Recipi, che i è sempro roba cara
I suda, i va de corpo, e da so posta
I guarisce, e du soldi la ghe costa.
Innanzi che un Villan se traga in letto
Bisogna dir che 'l mal sia de quel bon,
Finchè 'l pol el sta in piè, ma se costretto
El sia dal mal a metterse a mason,
Per grando che sia 'l mal mi ve prometto
No se ghe dà galina, gne capon
Al pì quando se vede che 'l va al manco
E che i lo sacramenta, el sta a pan bianco.
E si se vederà pì contadini
Vecchi che sassi, e como campanei
Sani; al contrario tanti Cittadini
Marzi che fonghi, e rossi como Abrei
Con tutte le so purghe, e bocconcini
Presto i se fa cantar ora pro ei
Le schinelle se vanta per grandezza,
E propria del Villan par la vecchiezza,
E po de sora in Villa l'aria istessa
Rotta dai venti, e raffinà dal Sol,
L'è, bosogna che 'l diga, e che 'l confessa,
Na mana per star sani, e quan se vol
Star sempro como el pesce in la so gressa,
Col bon governo gnente mai ghe dol;
Chigo in somma s'è fora dai perigoli,
Gne roversi se vede tanti ombrigoli.
Anzi i Medeghi stessi de Città,
Quando che un mal no ghà rissoluzion,
I dis: menè de fora sto ammalà
Che 'l mudar aria ghe porrà far bon;
Donca la Villa a dir la verità
L' ha n'aria pì perfetta, e in concrusion
L'è mei scampar un pezzo Contadini,
Che morir a bonora Cittadini.
Oltra de che i Villani i è azzalè
Massime contra i tempi stravaganti,
Per gran freddo un zippon per loro è assè:
Gabban, pelizza, manizzoni, e guanti
Al Cittadin no basta mai, perchè
I ha n'inventario squasu tutti quanti
De strazze indosso, e tante che se pol
Na bottega fornir d'un Pezzarol.
Che segno è questo? Se no che in Città
L'aria pì cruda, e pì cattiva sia,
E che per conseguenzia chi ghe stà
Habbia la pelle marza ingaranzia,
Che dal freddo l'è presto penetrà,
E se fà caldo el par che i passa via,
I và in fastidio, i soppia, e i se fà vento,
Villani a far ste smorfie no de sento.
Stemo l'Istà nù altri là defora
Al Sole sempro come i Campanili,
Sia Lugio, e Agosto no se guarda l' ora
Brusà, che ne incandisse co e Fenili,
Se suda, no se muda, e se laora;
Ma a sti corpi Lustrissimi, e Civili
Tutto ghe fà paura, e ghe dà impazzo
Un pò de Sol, na fregola de giazzo.
Donca che s'ha da dir? se no quel ch'è
La verità, che i poveri Villani
Starà pì che no è quei delle Cittè
Pì prosperosi e forti, inton, e sani,
Donve l'aria se domina piassè
E la se purga; basta dir che i Cani
Della Città tanta legrezza i fà
I corre, i salta, se alle larghe i và.
I se svoltola, i baja, e proprio el par
Che i diga al so Patron: fermeve chì
Che goda st'aria averta a respirar;
All'incontro in le case i vedarì
Che la coa no i ha voggia de squassar,
I stà su na carrega tutto el dí;
Ond'ecco chi che la natura insegna
Che l'aria averta l'è na cosa degna.
E pò desime un pò se mai la gotta,
Quel malan che dei grandi el mal se dise,
Vegna su quei che sempro ha la pel cotta
Dal Sol, dal freddo? ah chigo me predise
El cor, che 'l Cittadin resta a sta botta
Che ghe farà vegnir an le vernise,
Costretto a confessar la verità,
Che sta pesta de mal ven in Città.
Così il mal della prea, così la rogna,
I calli, le buganze, altre schinelle
I è mali de Città; sicche bisogna
O dir che sia del Contadin la pelle
Meggiora, o dir, che como la scalogna
Gha 'l so terren che ama, così quelle
Pì che al Villan, al Cittadin le ven,
Che la Città sia proprio el so terren.
N'altra cosa dirò forse de mei
Per provar mazormente el me argomento,
Che le Donne de fora fa puttei
Senza tante scamofie al Sol, al vento,
E bianchi, e rossi, e tondi che Vedei,
E del latte agni dì le de fà un brento,
Ma ste Siore le fà mostri che i par
Cigalotti, e i è sutte co è un brespar.
Ho sentù a dir che pì d'un Cavalier
El s'ha reduto per la povertà
A retirarse sora in tel so aver,
E alla zappa e al versor an lu s'ha dà,
E dei Villani l'ha imparà 'l mester,
Sempro san, prosperoso, e in ton l'è stà
Tanto che s'anca in bonis l'è vegnù
Tornar alla Città no l'ha vogiù.
El dormir, el magnar l'è un contrasegno
De Sanità, me diga el Cittadin
Como ch' 'l dorme in Villa; ma m'impegno
Che 'l catta un sonno tanto fisso, e fin,
Che 'l dorme como na marmotta, a segno
Tal che in Città na mosca, o un mussolin
Lo desmissiava; e in Villa no per diana
Nol sente se i ghe sona na Campana.
Così el magnar; guardè un pò là de sora
Che pettito ghe ven, ma de quel bon
Se qualche volta el leva su abbonora,
Lè bon de farse dar da collation,
E disnar anca ben quando ven l'ora,
In tempo che in Città ghe fà el magon
Se 'l magna for de pasto, o pur se 'l beve
Ghe fà saltar la stomegara greve.
Nemo innanzi un tantin, fem n'altro passo;
Quan l'Autuno ven sora sti puttei
Alle vendeme per mandarli a spasso,
I ven che in te la ciera i par abrei;
Ma co i scomenza a far un pò de chiasso
I muda ciera, i ven in ton, pì bei,
Tanto che quando i torna no ghe stà
Pì ben i gabbanoti de Città.
Questo è pur n'avvantazo el pì evidento
De chi vive in la Villa, donve sani
I Homeni se manten mei che là drento
In le Cittè, donve che i corpi umani
Se pol dir come l'ua messa in t'un brento
A smasararse, e nu pori Villani
Semo come le pettole in tel Sol
Perchè le dura quanto mai se vol.
Donca concruderò che la natura
Vol l'aria averta, e quella de Città
No l'è al vivro del Homo sì segura
Come quella de Villa, e l'ho provà
Con tutte ste rasone, e n'ho paura
Dir che per conservar la sanità
Sarà sempre la Villa pì a proposito,
E negun me pol dir ch'el sia sproposito.
Perchè quel che se mostra all'evidenzia
Dei fatti, contrastarlo è ostinazion,
E se v'ho demostrà con l'esperienzia
La massima piantà, la me punion,
No so con che bon anemo, e consenzia
Podè negarme, e dir, che n'ho rason,
Cittadini me cari: ma v'aspetto
In st'altra canta sor'altro sugetto.
.jpg)