Siè cantè sora la villa/Cantà I
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← A chi vorrà leggere | Edission e fonte ▼ | Cantà II → |
EL Mondo è grando, e gh'è tante Cittè,
E tanti gh'è ch'ha slaudà la soa;
Ma dei pori Villani uno no gh'è,
C'habbia volesto dirde ben per doa,
Come se i fusse cani mal vardè
Per questo i chen tegner bassa la coa;
E in somma sen tegnui nù contadini
Come tanti descalzi malandrini.
Che però quan la cosa sia così,
Sebben ne son Poeta, ne Slitrà
Ho pensà de volerme metro mì
A slaudar la Villa, como zà
Verzilio, e quarcun'altro ha fatto un dì:
Quel che dirò sarà la verità,
Che ne me voi impegnar a sostentar
Cosa che i me podesse contrastar.
Basta che Messer Pollo, e le so Siore
Ghe meta una spalleta, e le me daga
Un tantin del so spirito; de core
Le suprico, e le prego alla me baga
Dar un po del so fià, perchè le fiore
Vien dal Vezoto, gne occor pì che vaga
A torde na spanzà como solea
De quel che lena, e forza me dasea.
E po perchè a ste pore sversaure
Ghe sia portà, com' se sol dir, respetto
Sebben i è debolezze, e i è freddure
Trate là senza grazia per dispetto.
Amici Vù de farmele segure
Ve suprico dal vizio benedetto
Del Cizoron a Vù pì che a neguno
Presento quanto in sto libretto arsuno.
Musa quan lè così fate ardimento
Di su con libertà, ma con sto patto
Che se te tressi le parole al vento,
Negun possa trattar l'Autor da matto,
A sostentar, col mettrese a cimento,
La Villa al par delle Cittè: sto fatto
Nol dirò mai; ma col me po d'inzegno
Della Villa i vantazi dir m'impegno.
E la Villa m'intendo che la sia
Quella che se sol dir anca Campagna,
Donve anca i Siori a godro la legria
I sol vegnir, e far la so cucagna,
Massimamente quando in compagnia
I se cata in pì d'uno, i beve i magna,
Disendo pur che i ha lagà i travagi
In Città coi negozi, e coi zavagi.
Onde la Villa ve dirò che l'è
Logo de libertà, gne suggecion,
Chigo negun se dol, chigo anca i Rè
Se tira a far la vita del poltron,
Chigo i Dottori, e tutti sti Slitrè
Se dis che i è vegnù à sorarse el magon,
Chigo in somma se ven a godro in pase
Quel che dell'Homo alla natura piase.
Negun me negarà che la natura
Fuza la suggicion, vol libertà,
E questa sempro de cattar percura,
Gne l'Homo se vorrea vedro será,
Ma godro l'aria averta, e pì segura
Da imbrogi e guai, e in pase, e in carità
Vivro pì che se pol senza malanni
Senza tegner el cul su cento scanni.
Como fa squaso tutti i cittadini
Sempre pieni de brighe, e de bragheri
Per cà soa, per amighi, e per vesini
Cent'arte i vorea far, cento mestieri,
Tutto, co se sol dir, per far quatrini,
Millio strade se tien, millio senteri,
Per cumular, e tante cure in cesto
I Preduse in cariola, e i crepa presto.
Ond'ecco chi che la natura tende
A conservarse pì che mai la pol,
L'Homo tutto al contrario in ste facende
Se va desfando como neve al sol,
Se decrina pian pian; ma no 'l la intende
Perchè quando che i ossi e 'l cao ghe dol
El dise, i è flussioni, e i è cattari
Mai l'incolpa el strusiarse in tanti affari.
Andemo pò a guardar la prime etè
Del mondo, e vedarem quando vivea
L'Homo settecent'anni anca piassè
Donve che l'abbitava, e do el stasea,
Se sora in le Campagne, o in le Cittè,
Se a negozi, se a imbrogi mai 'l tendea;
O se pur senza torse tanti guai
Godea star all'averto pì che mai.
Messer Adamo nostro pare istesso
El fu creà in t'un campo, e no in Città
E se no l'hesse quel gran fal comesso
Nol se saria partì mai fora de là,
E così nu saressene là adesso
A godro senza guai la libertà;
E in sustanzia savemo an nu de certo,
Che el Paradiso l'era un logo averto.
Se 'l peccà donca al mondo nol vegnea
No ghe sarea tante Cittè gne mura,
Che sera l'Homo como na galea,
E quel che 'l fà serrar l'è la paura.
Prima figiola della colpa rea,
Per causa de costia boson che 'l dura
E che 'l staga in preson serrà là drento
Senza vegner mai fora a so talento.
E questo è godro la so libertà!
Per questo se dirà che l'Homo sia
Libero! effetti tutti del peccà,
Per altro se costù no vegnea via
A tossegarne el ben, che Dio n'ha dà
Tutti insieme all'averto se staria;
Tutto saria Campagna averta, e Villa
Dove che 'l cor ne giubila, e ne brilla.
E pò guardè na bestia, n'oselletto
Che differenzia gh'è quande l'è fora
Alla campagna, e quan l'è in gabbia stretto,
Sgola de pal in frasca, e in te l'aurora
Se desmessia, va al pian, e va al boschetto,
Fa quel che 'l vol, el canta che innamora,
Ma quan l'è serrà sù per forza in gabbia
Se la fur d'oro el crepa dalla rabbia.
E l'Homo solo col so bon giudizio
Nol sà cognoscer gnanca el so vantazo,
Sibben che 'l star serrà l'è 'l precepizio
Della natura, sia Zenar, sia Mazo
Gode star in Città, col pregiudizio
D'esser misero, schiavo, e pagar l'azo
Anca dei dì che 'l chen star in galea,
E no l'è questo aver guasta l'idea?
Fortuna te ringrazio, e Ciel benigno
Che m'havì fatto nascer un Villan,
O deventarde; che sibben el scrigno
No pos chigo impienir, almen lontan
E asento vivo agnora dal maligno
Crima delle Cittè; che digo alman
Godo la libertà che l'è un tesoro,
Ch'è da stimar pì che l'arzento, e l'oro.
Forse quarcuno me dirà a sto passo,
Che se credesse da scampar d'agn'ora
Per esser un Villan no son un sasso
Che dura sempro, ma boson che mora;
So an mi che tutto ha fine, e casca al basso
Col tempo, e tanto dentro quanto fora
Delle Cittè se more; el so de certo;
Ma alman podarò dir, moro all'avverto.
O almanco morarò libero e franco,
E sibben morarò da poeromo,
For de gabbia, o preson morarò almanco.
Fora alle larghe como un galantomo;
Me basta de vanzar de ponto in bianco
Da farme sebelir, e con bon lomo,
E merito morir da bon cristian,
Che questo fà grolioso anca 'l Villan.
Sicchè concruderò sta prima canta,
E farò vedro el mondo pien de matti
Che vol crepar nemighi della Santa
Libertà, che da ognuno a tutti i patti
Se doverea cercar, e tutta quanta
La zente attenta a far millianta fatti
Per vanzar, la se scurta i mesi, e i anni
E la Città è causa de sti danni.
Perchè l'Homo per leze natural
Vorea scampar, e conservarse un pezzo,
No mia perchè el se creda da boccal
D'esser un castagnar, un larzo, un pezzo,
Chigo piantà per starghe n'arsenal
D'anni, e secoli, ma che senza prezzo
E la so vita, e la natura insegna
Quanto la libertà sia cara, e degna.
Per conservar la vita senza guai
Almanco tanti, quanti ghe n'ha quei
Che mai la cerca, e no la gode mai
Drento le mura de' Città, e Castei,
Nu Villani sibben parem Cavai
O costanè, o pelosi che Camei;
Senza tanti Palazzi in quarche baita
Con libertà stemo alla sguaraguaita.
E così secondemo la natura
Che la cerca, e la vol; così se scampa
Meggio de quei che fà bella fegura,
In la scena dei matti de gran stampa,
De quei che 'n mussolin ghe fa paura
E fuze el Sol come se 'l fus nà bampa,
Che i podesse desfar, e appunto questi
A sconirse e desfarse i è i pì presti.
No me disessi mia che le Cittè
Se no ghe fusse, no ghe sarea gnanca
Quei che da leze, e ne ten goernè,
E che regola el mondo, e che se manca
El governo mazzoro, e i Grandi, e i Rè,
E in somma no ghè fusse quei de banca
Che tegnesse el Registro, la sarea
Na babilonia el mondo, e 'l fenirea.
Perchè mi no ve digo, ve respondo,
Che ne gh'abbia da esser quei che reze,
E ne fà da Patroni in te sto mondo;
Perchè ogni corpo senza ordine, e leze
Và a tanfurlon confuso in tel profondo
Delle miserie, e zà ogni alloco el veze,
Ma posso dirve che quei del goerno
I pol star sor con nù l'Istà, e l'Inverno.
Senza voler serarse in sti gabbioni
Delle Cittè, ma como al tempo antigo
Fora in campagna sotto i so tendoni
De zà, e de là zirando, e chigo, e ligo
Come ghe par e piase, e da Patroni
Tanto, e tanto guardar dall'anemigo
I to confini, e star sora in Campagna,
Che scotta pur el Sol, che l'acqua bagna.
Che usandosse così forti, e gagiardi
Che stando al pal se faria fronte ai venti,
No se narea con tanti gran resguardi
De fadighe, de incomodi, e accidenti,
Forse la morte vegnaria pì tardi,
O alman nò ne faria tanti spaventi,
O se direa: vè pur no so che farghe,
S'ho da morir alman moro alle larghe.
Ma quel star a mason sempro all'ombria
In quei mezè, gabbioti, e camerini
Senza mai nar, alla malinconia
Se da logo, e in la ciera i cittadini
Se vede che i è tutti una genia
Mal impastà, che como quei ponzini
Che tegnui sotto al corgo mai va sora,
I ha sempro el tabarin che 'l par che i mora.
Fora donca alle larghe se sta ben,
E se respira n'aria sempro averta,
E l'Homo gode, come ghe pervien
La libertà sempro alla descoerta,
Seconda 'l tempo, o nuvolo, o seren,
In somma tutti ten per cosa certa
Che tutto se destruse in t'un momento
Quando 'l sia messo in t'un stato violento.
Magnè un poco in Città quande volì,
Finchè no sia sonà la bigolara;
Nè un poco for de cà se non l'è dì,
E se la luse no l'è pì che chiara
Ussi, porte, barconi, vedarí
Serrà su tutto como na lovara,
Boson sempre aspettar che slusa 'l Sol,
Così no se pol nar quando se vol.
No dirò che sia nar con libertà
Quel doverse vestir d'Istà, e d'Inverna
Como va i altri; e se quarcuno và
Vestì a so modo, e per so bon governo
Da tutti quanti dreo ghe ven guardà,
Questa è pur suggicion, tormento eterno
Dover per comprimento de Zenar
Creppar dal freddo, e d'Agosto sudar.
E volì Cittadini che ve loda
Se l'Istà ve carghè como asenei
D'abiti grevi, e per nar drè alla moda
Duri, e pieni de' basti, e però quei
Lè causa che l'Istà si sempro in broda;
Tanto che per vù altri el saria mei
Bandir i Sarti, azzò no i catta fora
Mode mai pì che ve traga in malora.
Nu altri al man de fora se vestemo
Pì che se pol l'inverno an de tacconi,
Ma l'Istà almanco via lizeri andemo
Godendo l'aria e senza altri ziponi
La camisa, e le braghe quan gh'avemo
Ne basta, e no n'importa parer boni.
Gne ne cose el cervel quella pelucca
Che fà che no se veda sal in zucca.
Altro de sto interesso no ve digo,
Abbastanza ho spiegà la me punion,
Che della schiavitù l'Homo e nemigo,
La libertà hà d'aver in concrusion,
Così in fatti fu sempro al tempo antigo,
E pena della colpa è la preson,
La natura che vol la libertà
Goder mai la la pol in la Città.