Siè cantè sora la villa/Per l'anno 1751
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1750 | Edission e fonte ▼ | Per l'anno 1752 → |
SIor Schieson caro, el vostro, Cannocchial
Ve fà parer grandi come colonne
I pettolotti delle pore Donne,
E questo è causa che de desì mal.
Perchè osservo ch'agn'anno le pestè,
E dritto e storto senza descrezion;
Senza pensarghe, e farghe reflession
Ch'avi da far con tante speritè,
Fornìe d'onge e de lengua alla vendetta;
Però guardève che sibben si scaltro,
No cattè quarcheduna un zorno o l'altro,
Che sù 'l bel Peluccon no ve le petta;
Havì rason che desì mal de quelle
Vostre là da Treviso, e no de queste
De Verona da ben, savie, e modeste,
Ch'altro no se pol dir che no i è belle:
Ma mi le lago star, e le respetto,
Perchè, se stuzzegar vorrò el bresparo,
Sarò beccà; e se movo el luamaro
Smorbo tutto el paese, e l'aria infetto.
A dirverla, pì tosto ghe la catto
A scovolar la polver dei slittrè,
D'Indici e Frontispicj infarinè,
E in fustanzia con l'M, in cima all'ATTO.
Massimamente quei che in le antigagie
Consuma col giudizio el cavedal,
E in fine i se reduse tanto mal,
Ch'altro no i pol basar che le medagie;
Così coloro che no vede l'ora
Che la robba dei altri sia stampà,
Per darghe adosso senza carità
Con quella malenaza so cizora;
Più de negun de quei, che catta gusto.
A lezer sempre libri Oltramontani,
Per quanto sento a dir, i par Cristiani,
Ma el Principal dei Diese l'è desgiusto.
Godo à costoro dar quarche sassà,
Stando però de drè sempre al macchion,
Perchè savendo quel che sò e che son,
No g'hò schioppo da farghe el Chivà là.
Ma, Sior Schieson, el me sforzo mazoro
L'è a far el me scartozzo el dì dei Gnocchi,
Cossa che no me trà la testa in tocchi,
E in fine almanco sò perchè laoro:
Questa, se no 'l savì, lè na gran Festa
De ciasso, e de baccan, ma bell'è bon,
Che se vedessi n'anno sta funzion,
Traressi via col Peluccon la testa.
Vedaressi gran Zente, e in tel Bogon
Del Gran Pan, del gran Vin, e gran Formai;
Godaressi un concerto a Tananai,
E na bella ordinanza a confusion;
Vedaressi vegner for de cà soa
So Cellenzia Rettoro Podestà
In tel so carrozzon incoronà,
Tiri, e carrozze che ghe và alla coa:
Na bella cavalcà che in mezzo el ten
Col so bel Capo che se ten d'in bon
In habito trinà con Peluccon,
E questi è tutti Putti de Sanzen.
Sentaressi cinquanta e pì Puttei
Compagnarlo sbraggiando e Viva e Viva
Fin Sanzen, e là quando l'arriva
Vedaressi quarcossa anca de mei;
Vedaressi un gran palco dove bogie
Un gran Parol de Gnocchi che innamora,
E Botter, e Formai da trarghe sora,
Robba, che fa le benedette vogie;
Da n'altra banda dodese Pitocchi
Vestii de bianco conforme l'usanza
Col so Pan col so Vin a creppapanza
Denanzi, e na gran piadena de Gnocchi;
Sentaressi pò a dir ch'alla Contrà
De San Zen in sto dì per privilegio
Antigo, Pan, Farina, e Vin del megio
Tanto per testa agn'anno ghe ven dà;
Ma st'anno sto Morevolo Rettor
Passa la parte, e vol che robba vanza,
E che sia vero dì dell'Abbondanza,
E se vol far da Generoso honor;
Sicche de Lù se dise, e se dirà
Quanto se pol dir ben a mazor segno,
Che l'è un Rettoro Generoso, e degno,
E ch'el Cor no lè soo, ma el l'ha Donà.
E senza far stampar de Lù na storia
Su i libri che se strazza o no se catta;
La Città de bei porteghi refatta
Del so governo eterna la memoria.
In sta Funzion l'è giusto donve latto,
E ghe vado de vita a sversezar
Senza stelle ne Cieli specular,
E chì me tacco, e gusto chì ghe catto.
Vù mo caro godibile Schieson,
Da Strolico cerchè de farve honor.
Col dar da guadagnar al Stampador.
Ma sò che no sarì tanto minchion;
Ma mi con vostra bona grazia digo,
Che sto mester dei Strolochi condanno,
Perchè quanto i prognostica in t'un anno,
Chi strucca ben no ghe ven fora un figo;
Mester che ve fà perder el concetto,
Se prognostichè in ben, un gramarcè
Negun ve dà, se in mal prognostichè:
I ve paga col siestù malengretto;
Zà tutto l'è de frottole impastà,
Ne in Ciel credo che sia quei vostri segni
Del Zodiaco inventè da matti inzegni,
Gne da Faole se cava verità:
Per assempio desì: st'anno da Marte
In Capricorno el sarà dominà,
Onde prognosticar guerre el ve fà,
Perchè ognuno vorrá far la so parte.
Marte è Pare de guerre, e de costion,
E Capricorno è tutto per la pase,
E l'è quel che se dise magna e tase,
E l'è colù che se ghe dise bon.
O
Come volìo costoro che i se unissa
A governar un'anno e nar d'accordo
Se Marte è fiero, e l'altro mutto, e sordo;
Questo è patiento, e quello è sempre in rissa
E pò vezìo Schiefon, che gran freddura
E la Faola de Marte in Capricorno
Costù l'è un poro mezo scemo e storno,
E Marte l'è na bestia per natura.
Mi se havesse da far el me Lunario
Vorrea metter in Lira i Formagieri,
In Vergine la spada dei Guerrieri;
El vin che se da all'opere in Aquario.
Vorrìa metter in Gemini i minchioni,
In Sagittario el cor dei debitori,
In Scarpion le Massare e i Servidori;
In Toro i Contadini, e nu Strussimi;
In Lion i contratti dei avari
In Ariete la Classe dei attivi,
In Capricorno quella dei passivi,
Metto in Gambaro al fin i Bottegari.
La Quaresima in Pesce ai Poereti,
Primavera in tel vin dei Contadini,
Suta d'Istà in scarsella ai Cittadini;
Sbrisa d'Inverno ai Strolichi e Poeti,
La Luna sempre piena ai litiganti,
Le crisse a quei che perde a Faraon
Far levar tardi el Sol per el Poltron
Felomeni su i Libri dei Mercanti.
Chigo caro Schieson ve reverisso,
Tutto ve accordo, e son del vostro humor
Con la spada alla man el vostro onor
Son sempre per deffender. E fenisso.