Siè cantè sora la villa/Per l'anno 1756
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1755 | Edission e fonte ▼ | Per l'anno 1757 → |
MI no credo che vada mai pì sgonfo
El tempo, ne se tegna pì d'inbon
Como della Bondanza a sto Trionfo,
E in fatti poro vecchio l'ha rason,
Che tutto el mondo l'è remodernà
E d'antigo gh'è poco pì de bon,
Se quarche tocco ghè d'antighità
L'è in la rena, e de prede in quattro tocchi
Arsunè dal Maffei quel gran Slitrà.
Ma sta bella funzion del dì dei Gnocchi
N'antighità l'è viva bella e granda
Senza strepiti d'arme, o spade, o stocchi.
Lago d'altri le feste da na banda,
Questa un Trionfo l'è della Bondanza
De robba che a Sanzen da godro manda.
Quel che de sta Cittá ten la baldanza
E reze como un Pare sta Famegia
Con quel amor ch'agn'altro amor avvanza,
Questo un PISANI l'è ch'el me somegia
A n'Anzolo dal Cielo chì mandà
Per far del ben, ladin co è na poegia.
La fame zà se vede incadenà
La miseria, la guerra, e ogn'altra razza
De malanni che fà la povertà.
Drè al caro Trionfal che dalla Piazza
Conduse sta Bondanza a na Contrà
Tutta in galla, e legrìa, ridente in fazza;
La robba che con generosità
Ghe manda e da magnar, e da far Gnocchi
Forsi tanta in sto dì mai pì gh'è stà.
Allegri, o Sanzenati, e vù Pittocchi
Innasiè pur la panza, e vù Puttei
Fornive sù con bei gallani, e fiocchi,
Che da magnar g'havì tanto che mei
De così no sò mai con pì contento
Chi ve possa trattar e far fradei,
Cento Formagi, e cento Brenti e cento
De vin, e cento zerli de bon pan
Và innanzi al Carrozzon d'Oro slusento.
Che tutto maestoso và pian pian
Scodendo prausi, e viva per le strade,
Mille Benedizioni e basaman
Banderre, soni, canti, e mascarade
Tutto rende pì bella la Funzion
De sto Trionfo; e dir de pì no cade
Ch'agnun el vede, e vede che l' Bogon
Una imagina l'è de quel ch'apponto
Fasea Roma al so Cesaro e Supion
Me despiase ch'a un termino son zonto
De dover lassar chigo per mancanza
De tempo, che per altro sarea pronto
Millianta versi far sù stà Bondanza.