Siè cantè sora la villa/Per l'anno 1755
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1752 | Edission e fonte ▼ | Per l'anno 1756 → |
ST'anno no canto miga per el lecco,
Che fà cantar quarcun, gne per la gola
De farme el gosso, e de mogiarme 'l becco;
St'anno me fà cantar na cossa sola,
Mai per farve rossir, mi ve la digo,
CELLENZIA, e zà de Vù la Fama sgola,
El vostro Lomo, el Lomo GRADENIGO
E 'l vostro far, Moreolo RETTORO,
M'ha descantà, m'ha messo l'Estro antigo.
El Lomo de quel nostro bon PASTORO,
Gramarcè a Lù mi son quel ch'ancò son
Dal cor nol me và via fin che no moro,
Questa questa ve zuro è la rason,
Perchè Ventura rompe un zuramento
Per così dir, e muda la punion,
La mudo, e de mudarla no me pento,
Salvo l'onor de tutti, quan ve lodo
Dago a tutti piaser, per quanto sento.
De quel che fu nostro PASTOR, NEODO
Vù si, e fradel de chi sarà PASTORO
Dabben como so ZIO prudento e sodo;
Della Vostra FAMEGIA è un bel decoro
Aver tri DOSI che se fus Profeta
Direa quanti hà da aver quel manto d'oro;
Anor dei GRADENIGHI è la scufieta
Che porta sotto el CORNO el DOSE in testa
Che ghe donè quella brava vecchieta;
Chi sà de Vù? Boson chigo che resta
Per vegner sù 'l preposito d'ancò,
E dir de Vù quarcossa in te sta Festa;
Veramente no sò como farò
Così alla presta dir tutto de Vù
Quello che se pol dir; e quel che sò:
Tanto che adesso che ghe penso sù,
Con se sol dir, l'ale cascar me fà
El gran merito vostro e la Svertù;
Farò però como quel che no sà
Quanto sia grando el Sol: el dis l'è tanto
Lontan da mi; donca tanto el sarà;
Dirò intanto de Vù, che si l'incanto
Dei nostri cori, e si quel Sol ch'ancò
Slusisce in sta Città col pì bel vanto;
E pò del Vendri Gnoccolar dirò,
Che sta funzion agn'anno la se vede,
L'è funzion popular, mà bella an pò;
L'è na funzion, che quarchedun la crede
Un bagolo, un baccan, na confusion;
Ma dell'antighità l'è vera erede;
Quando Licurgo, Socrato, e Praton
Per quanto dise chi sà pì de mi
I fè le leze per la so nazion,
I ordenè, ch'alla Prebe agn'anno un dì
Fusse lassà de star in allegrìa
E de godro a nissun fusse impedì:
Che quel dì el fusse na Corte bandìa
Fatta dai Re, dai Prencipi, e Soprani,
Che i desse pur, e che i buttesse via;
E che dei Cittadini, e dei Villani
Comun fusse la Festa. E spade e stocchi
Da quella Festa i stesse pur lontani;
Che i desse da magnar sia carne, o Gnocchi
Al populo, e se dise che i godea,
Con se sol dir, una legrìa su i fiocchi,
Ma el pì bello de tutto dependèa
Da quel che governava la Città
Farla alla granda, e con superba idea;
Farse al populo vedro in Cavalcà
Allegro in fazza, e tutta la so zente
Scondre per così dir la gravità;
Compiaserse de tutto, e con ridente
Bocca parlar a tutti, e como un Padre
Ai fioi dar tutto, e lù tegnerse gnente;
Far nar denanzi in galla le so squadre
Como una Sposa el dì delle so nozze.
Compagnà dalle Putte pì legiadre.
E nar con bei Cavai belle Carozze
Soralogo alla Festa, e pò tornar
A Casa a dar el sacco a piati, e bozze
I mazori d'agni ordene trattar
Far che nissuno mal contento resta
A tutti un cor istesso desmostrar;
Sarà attenzion del Prencipe in sta Festa,
Che nessuno dei soi como succede
Sora dei altri vogia alzar la gresta.
O pur slonghi le man, quanto se vede
Tutto senza mesura se despensa.
E guai se quarchedun manca de fede;
Così ordenè quei vecchj, onde sta immensa
Turba che gode chigo la par quella,
E no l'è un chiasso como quarcun pensa,
Questa è na festa popular e bella,
Che de quei tempi seguita l'usanza,
Altro no se pol dir per Dianastella;
Quest'è un vero trionfo d'abondanza
Fatto da Quel che l'ordena e comanda
Segno de bon amor e l'è in sustanza;
E st'anno el se pol dir fatto alla granda
Con generosità da sto RETTORO.
(Lasso quel che fè i altri da na banda);
Contento vedo el piccolo e 'l mazoro,
E Vù CELLÉNZIA, si de sta funzion
El condimento, e si el pì bel decoro;
Con che ordene s'ha visto in tel Bogon
La robba da magnar nar a Sanzen
Che su sta festa ha tutta la rason?
Agni zerlo agni brento era ben pien
E de pan e de vin ma tutto un gnente
A quel bel cor dal qual tutto ne ven;
Viva cento Puttei, Viva la zente
Cria per la strada, e Viva el GRADENIGO
Viva el so Cor, la Man, la so gran Mente:
Se vegnesse quei là del tempo antigo,
E quei soprani che rezeva allora
No sò quel che i direa se i fusse chigo.
Forsi i direa che i se recorda ancora
Delle so feste antighe pì grandiose,
Ma che questa de quelle è pi mazora,
Che in quei tempi no ghera tante nose
E che in sustanzia la Festa d'ancò
Lè tutta fatti, e no chiacole e vose;
E mi con premission, ghe zonzarò,
Se Cesaro vegnesse al Mondo ancora
Cossa el podesse far de pì, no sò;
Ma con ste bone bagie passa l'ora,
E no sò ancora don nar a disnar
Con na vogia de Gnocchi che innamora.
Ma che la vada como la sà andar
L'anzolo in quarche logo calarò,
E a Vù CELLENZIA, un prindeso voi far
Sentì como dirò....
Nessuno gode el Sol pì dei Villani
Che i ghe stà sotto agni stagion agn'ora
Quello i ten sutti prosperosi e sani,
E senza lu narea tutto in bonora;
CELLENZIA Vù si el Sol che i nostri piani
E i nostri monti sta stagion indora
E sibben nù de fora sem lontani
Vedemo el Vostro Bel che ne innamora;
E mi pì de nessun poro Villan
Che a sto bel Sol renasce e se ravviva
Ve posso dir quel che vedo lontan,
Le Grazie, e le svertù ve vedo in stiva
Parte in tel cor e parte in su le man:
Oh che bel Sol! Oh che bel Sol! Eviva.
.jpg)