Su i bancheti de Santa Lussia

by Giovanni Ceriotto

3 Su i bancheti de Santa Lussia Poesie veronesi Nina nana I regai de Santa Lussia Giovanni Ceriotto 1911 XX Soneti veronese

Indice:Poesie veronesi (Giovanni Ceriotto).djvu

Giovanni Ceriotto ―  Poesie veronesi

Su i bancheti de Santa Lussia

1911

Edission original:	Giovanni Ceriotto, Poesie veronesi, Seconda edizione accresciuta, Verona, Remigio Cabianca editore, 1911
Fonte:	Indice:Poesie veronesi (Giovanni Ceriotto).djvu

←  Nina nana

Edission e fonte ▼

I regai de Santa Lussia  →

Su i bancheti de Santa Lussia

     Sora i banchi de sta santa
gh'è beline¹ par dispeto:
Gh'è i sioloti che i te canta,
4fati a forma de galeto.

     Gh'è 'na bela carioleta
e 'na spada da ufissial....
— El me cambia sta trombeta
8che la sona così mal! —

     Gh'è 'na tromba che fa 'l ciasso,
su la boca de un putel....
— Che sussuro, che fracasso,
12con quel toco de cortel! —

     Pignatine e raminete,
tuta roba a bon marcà...
— Se sta siora la parmete,
16de tirarse un poco in là! —

     Scaldaleti picinini,
col so mànego² de fero...
— El ghe toga³ a i so putini
20sto zugatolo de vero!⁴ —

     — Èlo mato!... Se ghe togo
sto zugatolo che quà,
i lo sgnaca⁵ par el logo⁶
24e l'è belo che rangià!⁷

     Gira intorno a sti bancheti
tante vósse:⁸ «Cosa vuto?»
L'è 'n afar de puteleti,
28che i voria cromparse tuto.

     Un mostricio,⁹ che, par caso,
l'era suto de scarsela,¹⁰
l'à spetà che i volta el naso
32per robar 'na campanela.

     De ― ren ― den... Ci l'è che sona?
L'è un putel co' na campana.
Santa Lussia l'è 'na dona,
36che la vol menarlo in nana.¹¹

     De ― ren ― don... L'è Santa Lussia
che l'è sconta soto al leto...
ghe dirò che 'l fredo el crussia
40che la porta un scaldaleto.

---

Note

1. beline: giuocattoli
2. manego: manico
3. el ghe toga: comperi
4. vero: vetro
5. i lo sgagna: lo gettano
6. logo: stanza
7. rangià: rovinato
8. vosse: voci
9. mostricio: ragazzetto
10. scarsela: saccoccia
11. in nana: a letto