Thesaurus
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Consulto | Edission e fonte ▼ | Romanza per soprano → |
.jpg)
Amen dico vobis, quia dives difficile
introibit in regnum coelorum.
Matt. XIX, 23.
No la credesse mai che sti brilanti
I fosse strasse o culi de bichieri!
I xe tuti da prezo e tuti veri,
Doni oferti da principi regnanti.
I rubini i xe boni tuti quanti,
Tuti quanti i smeraldi i xe sinceri;
Per contarli ghe vol dei mesi intieri
E no i li conta mai perchè i xe tanti.
Ghe un tesoro che dorme in sagrastia,
Inciavà ne le casse e nei cassetti,
Cocolà, conservà con zelosia.
Cossa vorlo? La xe roba de preti,
Che se tocase a mi, li spenderia
In tante carità pei povareti!
Ma lori i xe cussì! Sta bona zente
Che per la fede i ghe daria la pele,
Soltanto che i ghe toca le scarsele
I schizza via el velen come el serpente.
La parola de Cristo no i la sente,
I trafica con l'ogio e le candele,
I tien banco de grazie in Israele,
Insomma no i fa mai gnente per gnente.
Questo xe el so pecà! Mi ghe l'ho dito;
Renovemose in Cristo e me rincresse
Che finora i xe stai duri d'udito.
Forse no i sa come el Signor vivesse,
Se 'l predicasse o no, ma i sa pulito
Se la rendita cala e se la cresse.
Ma i dise — «La ricchezza la xe el segno
«Esterno de un poter che no xe poco.
«Come? Ste zogie qua, toco per toco,
«Dunque le dovaria meterse in pegno?
«Ma de pompe e d'onor Dio no xe degno?
«Ma el Papa galo da campar a scroco
«E galo da vestir come un pitoco,
«Senza un anelo in man, senza un treregno?»
El Papa? Eh, lo so mi che el se contenta
De i cuori che sta fidi in Cristo e saldi;
Lo so mi come l'oro el lo spaventa
E el crede che i rubini e che i smeraldi,
Per far del ben ai povari che stenta,
I stava megio in man de Garibaldi.
E, desgrazià! so ben che i dì de festa,
Co el vien dabasso tra le trombe e i viva
E i lo pianta sul trono in prospetiva
Vestio de bianco e col treregno in testa,
So che in fondo de l'anima se desta
Tuto l'oror de la so vita, priva
De la beatà libertà nativa
Che ralegrava le canizie onesta.
Povareto! So mi, che dir lo posso,
Come ghe pesa su le spale el manto
Co'l benedise el popolo comosso;
Come, al sentir dei alealuia el canto,
Soto le zogie che ghe splende adosso,
Ne l'anema no 'l gà che strazio e pianto!
El pianto che recorda amaramente
L'alba del dì che nasse a l'orizonte,
El sol che indora i culmini del monte
E madura le spighe al pian fiorente.
Quanto tempo passà! E ghe torna in mente
L'aria fina che lo basava in fronte,
L'acqua che susurava soto al ponte
E le campane che sonava lente.
De pensier in pensier, l'anema vinta,
Come in un quadro che la vista incanta.
La vita del passà ghe apàr depinta.
E el rivede la mama morta e pianta,
Che nel Signor sà indormenzà convinta
De retrovarlo in ciel, povara santa!
Povara santa, ti ga lassà in tera
Tanti recordi e ne la casa mia!
E mi no podarò de que ander via
Gnanca a basar la to povara piera?
No podarò pregar solo, la sera,
Ne la camara tua bianca e fioria,
Arente al leto dove xe finia
L'ultima to parola e la preghiera?
Vèdistu dove son? Serà qua, senza
Che un sluòr de speranza se prepara,
Carcerà come un ladro in penitenza.
Oh, prega Dio per mi, mare mia cara,
Preghelo che me daga la pazienza,
Per vegnir fora, de aspetar la bara!