Una bruta figura
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Una bela risposta | Edission e fonte ▼ | Una discussion su la luna → |
La baronessa Rùcola
parona de un palazzo
che varda el canalazzo,
de fazza san Tomà,
ga scrito una domenega
a tutti i so parenti,
amiçi e conossenti
l'invito che xe qua:
» La Baronessa Rucola
» si onora d'invitare
» Vossignoria Illustrissima
» al pranzo che vuol dare
» all'ora diciottesima
» del ventitrè corrente,
» per salutare unanimi
» il Carneval morente.
» Nella speranza vivida
» d'avervi in compagnia,
» cordiale affettuosissima
» stretta di mano invia.»
Crèder se pol benissimo
che quel zentil biglieto
prodoto ga el so efeto
e tuti ga açetà.
Fra questi un tal Garùsolo,
paron de speziaria,
che sempre la mania
gaveva de parlar,
e a furia de contarghene
de cote e po de crue,
finiva che le sue
gera contradizion.
Finìo l'aristocratico
pranzeto alegramente,
se mete quela zente
a far conversazion.
De li argomenti in tavola
meteva questo e quelo,
chi bruto, opur chi belo,
secondo l'ocasion.
Vien fora sior Garùsolo
parlar de malatie
che da le speziarie
el ga duvuo curar:
i cancri, le resipole,
la scabia e menengite,
la dopia polmonite,
el mal da partorir,
la freve, l'iterizia,
le gera malatie
che lu gavea guarie
co un so medicinal.
Dixeva po Garùsolo
che l'amalà più forte
de tifo, da la morte
no podaria scampar,
e se per caso el medico
xe un omo de talento,
façendo un bel momento
el tifo scomparir,
xe çerto, sicurissimo
ch'el mal ghe va a la testa,
e l'amalà no resta
che un povaro imbeçil.
A boca 'verta, atoniti
i altri xe restai,
nissun gaveva mai
sta cossa sentio dir;
e senza più riflèter
su quel che lu dixeva,
Garùsolo façeva
mez'ora de sermon.
A un çerto punto, caspita,
s'ha messo l'invitati
a rider come mati
sentendolo esclamar:
― So sta 'nca mi da picolo
― colpio dal tifo a morte;
― lo devo a la mia sorte
― se ancuo so ancora qua! —
Chi parla tropo
senza pensar
bruta figura
ris-cia de far.