Vuto no? Vuto sì?

by Berto Barbarani

3 Vuto no? Vuto sì? I due canzonieri I due canzonieri/Libro I - El rosario del cor Eviva el prà Lètara al Signor Berto Barbarani 1895 XIX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro I - El rosario del cor

Vuto no? Vuto sì?

1895

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  Eviva el prà

Edission e fonte ▼

Lètara al Signor  →

VUTO NO? VUTO SÌ?¹

     Gh'era par aria un vento
che el te disea così:
la luna l'è d'argento,
ma no la fa par ti.
                              Così diseva el vento,
                              così rispondo mi:
se g'avarò fortuna,
te cromparò la luna...
                              «Vuto no, vuto sì?»

     – Gh'era du, tri marcanti,
che i te disea così:
quanti vestiti, quanti
e gnanca² un par ti!
                              Così disea i marcanti,
                              così rispondo mi:
se te farè pulito,
te cromparò un vestito...
                              «Vuto no, vuto sì?»

     Fin che piovea, la piova
la te disea così:
ciao, veletina nova,
te bagnarò, sì, sì.
                              Così disea la piova,
                              così rispondo mi:
par farghe rabia a ela
te cromparò n'ombrela...
                              «Vuto no, vuto sì?»

---

Note

1. vuto: vuoi.
2. gnanca: neanche.