Carlota Aschieri

by Vittorio Vitturi

3 Carlota Aschieri Strade e vicoli I molini de l'Adese Vittorio Vitturi 1907 XX Poesie veronese

Indice:Strade e vicoli.djvu

Vittorio Vitturi ―  Strade e vicoli

Carlota Aschieri

1907

Edission original:	Vittorio Vitturi, Strade e vicoli, Rime veronesi, Verona, Fratelli Drucker editori, 1907
Fonte:	Indice:Strade e vicoli.djvu

←  I molini de l'Adese

Edission e fonte ▼

CARLOTA ASCHIERI

(parla un vecio patriota)

I.

     Se gh’era? altro che gh’era! Guarda quà
Sta cicatrice ’ndove i m'à ferì...
Ma no so stado fermo gnanca mi,
E che de gusto che me son sfogà!
. . . . . . . . . . . . . . . . . . . . . . . .

     El quatro otobre ’riva al Podestà
La gran notissia che disèa così
Che l’Austria andava via! ’ndovina ti
El bacàn ch’emo fato quà in çità!

Fora bandiere bianche ― rosse ― verde,
Cocarde, piume, e nastri su i capèi;
No se perde un minuto, no se perde.

     Ci ridéa, ci piansèa, ci se basava,
Siori e pitochi se parèa fradei...
E i suconi¹ i cicava, se i cicava!

II.

     Do sere dopo a spasso sul liston,²
Se vedèa ’na signora e un bel fioleto
Co’ la camisa rossa: un mostriceto³
Che se ’l guardava par amirassion!

     Quatro utissial tedeschi del bon ― ton
I era al cafè che i se bevèa un cicheto;⁴
'Pena i vede a passar el puteleto
I parèa tuti quanti in convulsion.

     “Falfluter Garibalda!» i mocolava,⁵
E quel più arente, co’ la spada in man,
L’era a un pèl de ciaparlo e ’l lo copava!

     Ma mi, de un salto, ciapo un careghin⁶
E lo sgnaco de brasso⁷ sul patàn
Ch’el rùgola⁸ de soto al tavolin.

III.

     Se scominsia⁹ una guera maledeta,
Ci a colpi de baston, ci a caregade;
E ci no g'à de meio zo sassade...
Quante pache,¹⁰ Madona benedeta!

     Sbalsa¹¹ fora i cröati in baioleta!¹²
Le done le urla come desparade,
Ci scapa ne i cafè, ci par le strade,
E la Brà in du minuti resta neta!

     La pora Aschieri,¹³ inçinta e spaventada,
Lì dal Zampi¹⁴ la urlava a le cruçiate,¹⁵
E in manco che t'el digo i là infrissada!¹⁶

     Massacrar una dona, bruti cani...
Ma se no i ne scapava da le sate¹⁷
Se de faséa un desìo¹⁸ do quei patani!

FINE

---

Note

1. [p. 103]Suconi: uno dei nomignoli con cui erano chiamati dal popolo i tedeschi.
2. [p. 103]Liston: passeggio in piazza Bra
3. [p. 103]mostriceto: ragazzetto grazioso
4. [p. 103]cicheto: bicchierino di liquore
5. [p. 103]i mocolava: bestemmiavano
6. [p. 103]careghin: seggiola
7. [p. 103]sgnaco de brasso: scaravento con tutta la forza
8. [p. 103]rùgola: ruzzola.
9. [p. 103]Scominsia: incomincia
10. [p. 103]pache: busse
11. [p. 103]sbalsa: bàlzano
12. [p. 103]baioleta: baionetta
13. [p. 103]Aschieri: la nota popolana uccisa barbaramente in quel trambusto
14. [p. 103]Zampi: nome dell’antico caffè all'imboccatura di via Nuova
15. [p. 103]urlava a le crugiate: piangeva gridando disperatamente
16. [p. 103]infrissada: infilzata
17. [p. 103]sate: mani
18. [p. 103]un desìo: una strage.