Casca le fogie
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Dopo la festa | Edission e fonte ▼ | Fogie d'autunno → |
.jpg)
Et consuerunt folia ficus et fecerunt sibi perizonata.
Genes. III, 7.
CIÒ, Tesorier Santissimo ― ghe digo ―
Volemo far stasera i nostri conti? ―
Lu el tol le carte e me risponde ― pronti! ―
E taca via, ch'el va come un castigo.
Dopo un poco ghe fazzo ― ohi, caro amigo,
Speta un momento! Cossa te me conti?
La psiche dei to pessimi defonti,
Tre mila lire de fogie de figo?
Mi la fruta me piase e me rinfresca,
La magno tuti i zorni e drento al piato
Ghe vogio sempre la so fogia fresca,
Ma qua resto balordo e stupefato
De sta zifra «che levati» e ladresca...
Tre mila lire! Caro lu, el xe mato!
No ― el me dise ― Paron, la se consola
Che le So fogie costa pochi schèi.
Queste le xe de rame e de stagnola
E serve per le statue dei Musei.
No galo visto mai che famegiòla
De medàgie le mostra e d'agnusdei
Che ghe manca soltanto la parola
E se pol dir, me li saluta Lei?
La fazza el conto ben: la vedarà
Che a scartozzarli con economia
El xe poco un chilometro quadrà;
E po' se spende sempre perchè, sia
O el marmo duro o la curiosità,
Ste pelegrine se le porta via.
Le pelegrine! Ah, fie de Satanaso,
Ah, marànteghe false e buzardone,
Donca vegni perchè i ve dà el ribaso
E no per farme benedir corone!
Donca andè pei Musei ficando el naso
Dove gh'è la riserva per le done!...
Ma cossa fali, lori del Travaso,
Che no i le sgnaca ne le so colone?
Ma chi le manda a Roma in sta maniera,
A portar via le fogie dai ritrati
E dai bambozzi imobili de piera?
Come se in grazia Nostra e de Luzati,
A l'ombra de la libera bandiera
No ghe fusse un esercito de frati!