Diseme quel che no so
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte prima, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 1.djvu |
| ← El Zorno de san Martin | Edission e fonte ▼ | I mii Viazzi → |
A donna de spirito
A donna che sa,
E che in ste materie
Xe un libro stampà
Ghe conto un fenomeno,
Che vero nol par,
Che a mi po spessissimo
Me toca provar.
Ridotto el baronzolo
Ogni anno mi son,
D'un toso petegolo,
D'un orbo frascon.
Che gusto ghe trovelo,
Mi questo nol so,
Eppur lu me seguita
A far sto filò.
Co va svilupandose
La bona stagion,
Un colpo me capita,
De nova invenzion.
E par de impossibile
No toco l'Istà,
Che subito subito
Son mi inamorà.
Pazienza se l'aseno
Co capita maggio,
El spiega i so palpiti
Con più de coraggio.
Ga pur un periodo
Del gatto l'affetto,
Se sa quando in gringola
Se mette el cagnetto.
Qualunque altra bestia
Mel dise Bufon,
Ga squasi invariabile
D'amar la stagion.
Ma mi coi quadrupedi
Star devo a livello?
Saveu ch'el fenomeno,
Ga molto del bello!
Go fatto el possibile
Per no ingambarar,
Ma sempre el pericolo
Mi vegno a incontrar.
Votiva una lampedą
Go un zorna impizà,
Pregandolo a lagreme
De aver carità.
Più assiduo d'un nonzolo
Ghe muo el cezendel,
La vacca ghe dedico
Se manca el vedel.
Dizuni, quareseme,
Mi cerco de far,
E tutto per vedarlo
Un poco a cambiar.
De rose, de bocoli,
De gigli, e gimè
Davanti all'imagine
Ghe metto el bouquè.
Ma tutto xe inutile,
I sforzi no val,
E invece facendose
Va cronico el mal.
Nell'atto medesimo,
Che stago scrivendo
Me sento nell'animo,
Un palpito orrendo.
Un occhio terribile,
Un occhio de fogo,
De ponzer benissimo
Ha in mi trovà logo.
Za mi me lo immagino
Che vu me dirè,
Oe cossa te pensistu?
Coi to trentatrè?
Capisso che zovene,
No xe la mia età,
E che sto zogatolo
Dovria lassar la.
Ma quando quel discolo
Orbetto crudel,
Del cuor el se imagina,
De farme un crivel.
I sforzi credemelo
Inutili i xe,
E poco m'incomoda
I me trentatrè.
Donnetta carissima,
Che unì alla prudenza,
Un fondo vastissimo
De fatta esperienza.
Tolè sto mio incomodo
Un poco a studiar,
Diseme l'antidoto,
Che mi devo usar.
E digo l'antidoto,
Perchè xe velen,
Quel mal che spessissimo
Adosso me vien.
E vu quel miracolo,
Ve prego oparè,
Che far no se immagina
I mii trentatrè.