El Bisbetico più incomodo
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte prima, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 1.djvu |
| ← Nascita e avventure d'una Moneta di Genova | Edission e fonte ▼ | La Musa e mi → |
Fra i gran bisbetici
Che in molto numaro
Frastorna, e popola
La società,
Ghe n'è d'un genere,
Che curiosissimo,
A deo mo merita
D'esser mostrà.
Xe questo el cinico
Che monta in colera,
Se d'umor ilare
Vede qualcun,
E casca in reprobi
Se malinconico
In siti pubblici
No ghe gnessun.
Delitto massimo
Per sto bisbetico
Torna, se un povaro
Ga bon umor,
Se in ira al barbaro
Destin che l'agita,
Battude incomode
No ghe dà el cuor.
Ma se sto povaro
D'un mediocrissimo
Stato economico
Xe contenton,
E netto l'anima,
Dalla sinderisi
No ga el fastidio
D'un morsegon;
Mo a vu sior tangaro
Va da far subito
L'effetto epatico
E a dir gavè,
Che no xe leciti
Quel ton, quei dialoghi,
Quel brio, quel spirito,
Quel de gazè?
Mo care viscere
Se sto individuo,
I vostri talari
Mai va cercà,
Se in pien, scusemelo,
No voria dirvelo,
Osequiosissimo
In cul ve gà?
Se moderandose,
Al bisognevole
Supplisce l'utile
Ch'el sa cercar,
Se i sibaritici
Pranzi, e l'asiatico
Lusso, da Socrate
Lu sa sprezzar;
Se confidandose
Nel Ciel, che provvido
Per vie invisibili
Ghe sporze el pan,
Nol fa l'ipocrita,
Ma in modi leciti
Ancuo godendose
Spetta el doman;
La bile orribile
El cuor ve rosega
Perchè godendose
No l'è Epulon?
Per questo cocolo
Lu v'è antipatico
E andė vardandolo
Con avversion?
Ma qua bisbetico
Ve vogio a calcoli,
E nella magica
Lanterna go,
Un tal che povaro
Mostra i so incomodi,
Spande gran lagreme
Susta da bo.
L'a' fioi sto misaro
Pare che insanguana,
Fradei ma in numaro,
Malai, muger,
El xe onestissimo,
Lavora assiduo,
Ma el bisognevole
Nol pol aver,
Malinconissimo
El tase, el medita,
Se pol za lezarghe
L'affanno in cuor;
Via sto spettacolo
Compassionevole,
Cossa in vu movelo
Che se un signor?
Quanto ne secchelo,
Vu da filantropo
Partìo sto misero
Sè el primo a dir,
Oh Dio che mangano!
Che vista incomoda!
Solo nel vedarlo
Lu fa morir.
Perchè mo libaro
Da tanti vincoli
Senza una femena
No xelo stà,
Ma invece stolido
E miserabile
De fioi, de debiti
S'alo cargà?
Col far da zovene
So Pare el discolo,
Ga verto l'adito
De far cussì;
Naturalissimo
Che tra i disordini
De buttar lagreme
Vegnisse el dì;
Dovea... ma fermite
Bricon de cinico
De puro tossego
Tutto impastà,
Nemigo acerimo
Vermo vilissimo
Che troppo bulega
In società;
Chi te supponistu
Perchè ingiustissima
La sorte un comodo
Stato ta da,
Se l'omo intrepido
La bile t'agita,
E chi è più debole
Sti frutti ga?
Genio malefico
Mi sì so intendarte,
Ti vol el povaro
Messo ai to piẻ,
Le piaghe squerzarghe
Contar le lagreme,
Per po scazzartelo
Nuo come l'è.
In chi el filantropo
Fa coi centesimi,
Chiamando a vedarlo
Fin chi nol vol,
Qual altro spirito
Compassionevole
Per darghe merito
Supor se pol?
Sentime barbaro
Fra quanti barbari
Fin tra i canibali
Se pol trovar,
Se un umor illare
Te passa l'anima,
Mi voi prestissimo
Farte crepar.
Dal mio cubatolo
Dove quietissimo
Dei versi medito
Co sortirò,
Un ton da sedese
Miera de talari
Sempre no avendoli
Mi assumerò.
E in loghi pubblici,
Dove inquietissimo,
Del lin sui petini
Sentà ti par,
Sarò assicurite
(Crepa pur etico)
Scherzoso el dialogo
A ravvivar.
L'elogio in funere,
O un necrologico
Ridente articolo,
Mi te farò,
Crepa, ma subito
Che za per fartelo
El bisognevole
Per ti lo gò.
.jpg)