El Mulo in gloria (1817)
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Qualche volta le disgrazie
Xe mo bone da qual cossa;
I canali le desgossa
Dove score la rason;
Le sculazza l'avarizia,
La libidine le scota,
L'amor proprio le sberlota,
Le desmascara un bufon!
Là in Romagna un Mulo in grassa
Brigliadoro d'un prelato,
Se vantava d'esser nato
Nel Haras del gran Signor;
Ma per altro po 'l saveva
Che so mare la cavala
Avea avudo for de stala,
Qualche fufigna d'amor.
Ma lu vol scordarse afato
Quel anedoto insolente;
De la mama no l'à in mente
Che le belliche virtù.
Quali, in fati, e quante imprese
Fate in Asia e qua in Europa;
Mentre ch'ela aveva in gropa
Scanderbek, o Tamerlan.
De sta gloria cavalina
Sgionfo l'anema superba,
Sdegna el Mulo el fen e l'erba,
El vol biava e marzapan!
El sta serio su le soe
Co i cavali da carozze:
Quei de posta ghe par rozze,
Quel del Papa... oh quelo sì!
S'io dovessi (el se diseva)
Portar qualche soldatello,
Un frataccio, un barigello,
Di rossore morrei lì!
Una sera, solevando
Baldanzoso al ciel la testa,
Co do ochiazzi lustri in testa,
Che le stele vol sfidar:
Va nascondi la tua chioma,
Forsennata Berenice,
Di mia madre, mira, dice,
L'aurea coda scintillar!
Sì dicendo, un per de zampe
Se ghe ingambera, e a l'ingrosso
Co la zara in mezzo a un fosso
Patatunfete, piombò!
Se ghe spaca la clavicola,
Ghe va un tronco in tel da oto,
I lo tira suso zoto:
56Quasi 'l collo si fiaccò.
Monsignor lo trova strupio,
Reso inabile al servizio:
Va, ti macina il giudizio;
60E al molin el l'à mandà.
Tra 'l baston e la cavezza,
Zopegando, a colo storto,
D'Enza madre el pero morto
64El s'à in bota recordà!