El campaniel de sa' Marco
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Uno dei Mile | Edission e fonte ▼ | Per Giacomo Favreto → |
a Gigio Vendrasco
Co passo per la Piazza e vardo in suso,
Che ghe manca me par el so splendor;
E do lagreme calde per el muso
Me cola zozo, e me se strenze el cuor!...
Alto, stupendo el gera; e, se vedeva
Da lassù, el mar, i monti e le çità;
Za più de undese secoli el gaveva
E in-t'un atimo, pùnf... el xe cascà!
In quel momento gera là sul Molo
Che vardava un Vapor vegnir da 'Lio,
E vedendo i colombi alzarse a svolo
Da la Piazza, voltà me son indrìo;
E lo gò visto sepelir de soto
La Logeta del nostro Sansovin,
Là indove al sabo se cavava e ' Loto...
Povare statuete, o Saul divin!
Ah, quele colonete, quei restei,
Chi lo sà se li vedaremo più?
E quele statue, e quei do quadri bei
De Tintoreto, chi li farà su?
Povero Campaniel, fato in-t'el nono
Secolo, cargo de memorie e onor,
De tuti i campaniei lu el gera el nono;
Ma anca i bisnoni, presto o tardi, i mor...
Ma lu el pareva eterno... Oh Dio, co bruto
Sogno! no, ancora vero nol me par...
Ma co vedo Venezia tuta in luto,
Convinçerse bisogna, e sospirar:
Nol ghe xe più! Ma, epur me par ancora
De vèdarlo là in Piazza drito in pie,
Quando che el sol a la matina indora
Sa' Marco, e i copi a le Procuratie.
De vèdarlo me par anca de sera
Quando la luna inarzenta el Leon;
Ma po' vardando ben dove che el gera
Vedo solo de legno un gran casson...
E lu el xe drento in quel casson d'abèo
Come un morto che vol resussitar...
La zente varda e pensa, e po' col deo
Segna un punto che el çielo va a tocar.
Xe mezanote, e 'na campana sona,
E se perde quel son lontan, lontan;
Ma nol xe de la vecia Marangona
Quel son che andava al cuor del venezian!
Sta campana gaveva la so storia,
E co la mezaterza e st'altre tre,
In coro le cantava la gran gloria
De Venezia, che morta no la xe.
E la gera del popolo la vose,
(Che, qualche volta xe vose de Dio),
Quando le saludava el vecio Dose:
«Pase a ti, Marco, evanzelista mio!»
A la matina, tute çinque in coro,
Le invidava la zente a lavorar;
E dal çielo lassù, l'anzolo d'oro
Sluseva al sol che nasseva dal mar.
E co le man, le so gran ale al vento
El destirava come in protezion;
E a pope, el mariner, dal bastimento
El se voltava a lu con devozion.
Partendo co le flote, i Barbarigo,
I Morosini, i Dandolo e i Venier
I saludava lu come 'n amigo
Da l'alto mar col cuor e col pensier.
Chi dito gavaria a Marin Sanuto
Che l'anzolo saria preçipità
Col Campaniel, e che Venezia e tuto
El mondo gavarave impressionà?
Quando in te la so Cronaca el scriveva:
«Geri a le quatro xe sta messo su
L'anzolo, e per la zogia se vedeva
Butar late... che Dio...» Nol ghe xe più!
Povaro Campaniel, no, lu nol gera
Come çerti bigoti so fradei
Che i sona solamente la preghiera,
Le novene dei santi, o l'agnusdei...
No, come lu no i gera liberai,
Perchè se i sà sonar l'Avemaria,
El vèsparo, la messa e i funerai,
Lori no i gà sonà per Porta Pia...
Lori no i gà sonà del Quarantaoto
Tuti a martelo la revoluzion.
A dir la verità, poco devoto
De i Campaniei in general mi son;
Ma, quelo de Sa' Marco, lo adorava,
E ghe darave, per refarlo, el cuor;
Quel zigante glorioso, mi lo amava
Come se ama 'n amigo, un protetor.
E me ricordo quando che putelo
La prima volta che so' andà dessù:
Co efeto! De esser me pareva in çielo,
E no sarave vegnuo zozo più.
Da dessù, se vedeva i monti, e in fondo
Da la parte che 'l sol vien su dal mar,
Trieste e Lissa!... E mi, credeva el Mondo
Co 'n colpo d'ocio tuto de abrassar...
E po' go visto l'ultimo dei çento
Povari cani che i se gà butà
Zozo da in alto per morir, e in çento
Tochi per tera, tuto insanguenà!
Povaro Campaniel, fin la saeta
Ghe gà dà fogo, epur brusà no 'l xe;
Ma, el tempo gà vossudo far vendeta,
E contro el tempo rimedio no ghè.
Ben gaveva rason Gigio Vendrasco
Co lo vardava, a metarse in pensier
Come se el ghe disesse: Presto casco!
Ma lu nol gera çerto un inzegner...
E çerti Bonaroti-Calandrini
I respondeva: No, nol pol cascar!
Co profeti, a, disè: coi çervei fini...
Quel capo-mastro el gera da ligar!
Ma se pensà i gavesse a quel zigante
Che gaveva la testa de oro fin..,
De bronzo el peto e i fianchi, e le do piante
De teracota, i sarìa andai viçin...
Pazienza; adesso, i lo farà più belo,
Tuto de piera, çento metri e più...
Ma çertamente nol sarà più quelo
Che ricordava la vecia virtù!
Più quelo nol sarà che le memorie
Del passà ben saveva ricordar!
Più quelo nol sarà che tante glorie
Contava de la gran dea del mar!
Zo, fè vèdar a tutti el valor vostro,
Operai veneziani e a vèdar fè
A quei che vegnarà, che el nome nostro
Dei nostri veci indegno no, nol xe.
Su, presto, presto; e de Sa' Marco el zorno,
Co la nona de l'Arte Esposizion,
In Piazza tuti al gran zigante intorno
Faremo in festa l'inaugurazion!
- Venezia, 15 lugio 1902.