El conte Redestola
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Bisogna salvar l'apparenza | Edission e fonte ▼ | Inverno cittadin, e campestre → |
Se taso me sofego,
Mi son za cussì,
Sti affari nel stomego
No i tegno tre dì.
Sto caso per regola
Propono a più d'un,
Che vol divertirsela
Pagando gnissun.
Ghe xe del ridicolo,
Ghe xe del moral,
El caso trascriverlo
Mi voi tal e qual,
Portà all'acque veneto
Per più d'un affar,
M'è sta indispensabile
Dei zorni restar.
La sera trovandome
In gran libertà,
Co un caldo terribile
Nel cuor dell'istà,
A mettarme in gondola
Per star manco mal
Mi andava, e a passarmela
Su, e zo per canal.
Co tutti i me comodi,
Là drento buttà,
Pareva de Tripoli
Un mezzo bassà.
Sior sì che me capita
Per doppio piaser,
Vicina una gondola;
Che ga un forestier.
Dell'Arno malissimo
La lengua a parlar,
Curioso mi subito
Me metto a scoltar.
Mi stimolo Trottolo
El mio barcariol,
Sta in coste alla gondola
Ma più che ti pol.
Co un fià de lustrissimo,
El dise sior sì,
Voi darghe de anema
La lassa far mi.
E infatti in un atomo
Lu messo vicin,
A mi el me dà comodo
Che scolto a pontin.
Co strussia pochissima,
Mi godo el piaser,
Dall'ose de incorzarme
Chi xe el forestier.
Sentì e po disemelo,
Se l'è original;
Ommissis et cetera:
Scoltè l'esenzial.
El dise: Ehi raccontami
Un poco, nochier,
Quant'è che tu eserciti
Cotesto mestier.
» Sarà la se imagina
» Selenza paron,
» Cinquanta quareseme,
» Che stao so a ca Tron.
» Dies'anni de pratica,
» Ho fatto, e un tochetto,
» Passao so a ca Pesaro,
» E dopo a un traghetto.
» Fenia la Reprubrica,
» M'ho visto intrigao,
» Ho fatto dei debiti,
» Go parso el figao.
» Ze stao tanto tossego
» Per mi quel cambiar,
» E ancuo apena el mastego
» Se pol vadagnar.
» So vecchio è verissimo,
» Ma so ancora bon.....
» Se posso catarmelo,
» Mi vago a paron.
Potresti trovartelo
Volendo anche in me:
Ehi dimmi per regola,
La spesa qual è?
» Oh Dio, per la gondola,
» Librea se la vol,
» Qua farghe in un atimo
» El conto se pol.
» La spende prestissimo
» Tresento ducati,
» De manco un santesimo,
» No va a conti fati.
» Per mi me le merito
» Sie lire ogni dì....
» El conto xe facile,
» Selenza cussì,
La spesa è sì piccola,
Che farla potrò,
Ma prima altro calcolo
Formare si può.
Rispondi, il più nobile
Alloggio qual è,
Che degno, intendiamoci,
Sia sempre di me?
» Selenza, moltissimi
» Ghe n'è in ste contrae....
» Pisani a san Stefano,
» Se l'è in libertae.
» In quello i so comodi
» La ga a battagion,
» La pol, me recevela,
» Ziogar al balon.
» Voi dir che le camare
» Xe grande, e xe molte,
» Le scale magnifiche....
» So stao vinti volte.
» Ma el prezzo po vedela
» Mi quel no lo so.
Di questo a mia regola
Notizia trarrò.
» Se vol vosustrissima
» Intanto provarme,
» D'imprestio una gondola
» Mi posso trovarme.
» Capisso benissimo,
» Che questa la xe,
» (Ghe robo i so termini)
» Indegna di me.
Domani in proposito
Risponder potrò,
Che io mi determini,
Te sol prenderò.
Io vado per metodo
Ai primi caffè,
Del conte Redestola,
Ricerca alle tre.
Finide ste chiacole
Al mio barcariol
Ghe salta sù i spalpari;
Tegnir nol se pol.
Capìdo da Trottolo,
Chi xe'l forestier,
Nol vol trategnindose
Tratar el mestier.
El dise » cavessimo
Collega da lai,
Qualcossa ne capita,
Se stemo taccai.
Co furia del diavolo
La bomba laora,
Mi vedo el paricolo
De andar in malora.»
Po dopo co un zerego
Capir el ghe fa,
Ch'el conte Redestolą
Lu crede un spiantà.
E che per so regola
In guardia lu staga,
Perchè figuremose
Nol perda la paga.
El vecchio el più zovene
No vol ascoltar,
E intanto Redestola
Comanda fermar,
Se gera alle Zattare,
El conte desmonta,
Mi stago quietissimo,
Quei do se la conța.
In collera a Trottolo
El vecchio disea:
» Zioghemoghe Mamara,
» Che go la librea?
Ma in mezzo a sti dialoghi,
Passada xe un'ora,
El conte Redestola,
No torna indrio ancora.
Le furie terribili
Depenzer chi pol,
De quel miserabile
Minchion barcariol?
L'aveva de seguito
Cinqu'ore laorà
E po poro diavolo
Ga el terno toccà.
La fiaba ridicola
Palpada con man,
Quel forca de Trottolo
Radopia el baccan.
Quell'altro va in colera,
L'è fora de lù,
Tirando del mocoli
Indrio l'è vegnù.
Cussì miserabile,
L'è sta el zogo d'un
De quei, che vol godarse
Pagando gnessun.
Zontada una virgola
No ghe qua da mi....
Dei conti Redestola
Ghen vedo ogni dì.
.jpg)