El regalo
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La morte aparente | Edission e fonte ▼ | La gamba rota → |
Un certo Marco Aurelio Monumento,
Che fava l'avocato in sta cità,
Persona de talento,
El s'à trovà,
5No sò per che rason
In qualche obligazion
Col conte Piero Anibale Sipario,
Ignorante in un grado sorprendente,
Ma rico estremamente,
10Milionario,
Prerogativa questa,
Che nei tempi presenti
La suplisce a la testa,
Ossia ai talenti,
15Mostrandone pur tropo l'esperienza,
Che un aseno signor
Se stima a preferenza
Del più bravo dotor,
Del più sapiente,
20Che no possede gnente,
E rico de diplomi leterari
Ze tuto el dì costreto
Per chiaparse 'l paneto
A far lunari.
25Volendo Marco Aurelio al conte Piero,
In un modo sincero
E delicato
Cercar de dimostrarghe
Che 'l ghe ne gera grato,
30Se pensa regalarghe
Benissimo ligada
In do volumi
Un opera moderna intitolada
«Progresso dei costumi»
35E messa soto el brazzo
Ghe la porta a palazzo,
Pregandolo a scusar
E voler acetar
Benignamente
40Quel picolo presente.
Ma pronto el conte Piero,
Dasseno no par vero,
Per comparir discreto sto pandolo
Se tien un tomo solo,
45E st'altro ghe lo torna a Monumento
Col dirghe — me contento
De un tomo e ghe son grato
Nè voi privarla afato
De un'opera che par
50Sia assae stimada.
Se s'à da giudicar
Da la maniera che la ze ligada —
A sto indizio de talento
Veramente inaspetato
55Col so tomo Monumento
Se congeda stupefato.
Nel'idea de far bordelo
Su sto caso singolar
Ghe lo conta a questo a quelo,
60E fa tanti sganassar;
Ma qualcuno ghe ne trova
Cussì scarso de inteleto,
Che lo tol per una prova
Quanto el conte è stà discreto.
65Fa conoscer l'anedoto in sostanza
A che grado che ariva l'ignoranza,
E come che la razza no ze persa
De quei che vede tuto a la roversa.