I tre Spiantai (1822)
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| ← Credendo d'esser sola | Edission e fonte ▼ | Una certa Donzelona → |
Essendo un dì al passegio in compagnia
Un Conte, un Avocato e un Zogelier,
El Conte salta su: corpo de dia!
Son sempre alcan co tuto el gran mio aver
L'Avocato sogiunze: vita mia,
Semo compagni; e sì, mi go un mistier
Da tesorar; e dise el terzo ancora:
Più che guadagno più vago in malora.
Cossa che sia sta roba po' nol so:
Ma qua ghè sconto certo qualche intrigo,
Più che laoro manco mi ghe n'ò,
Go manco bezzi, più che me sfadigo:
Saveu mo, puti, cossa che farò?
Quel che m'à consegià un bon amigo:
Me porterò doman da fra Vidal,
Che per consegj non se dà l'ugual.
El Conte, e l'Avocato salta su:
Amigo caro, no ne abandonar,
Permeti, che vegnimo là anca nu,
Per veder che'l ne possa consolar.
Andemo in bota, el ghe responde lu;
E tuti tre i se taca a caminar,
E in manco d'un'oreta i xe in quel sito
Dove ga el so tugurio l'Eremito.
I bate; e lu risponde, chi va là?
Amici boni, i dise tuti tre:
Chi diamberne mai seu, per carità?
Sogiunze el Frate, presto via, parlè;
In breve d'ogni cossa el xe informà,
E 'l ghe risponde come sentirè,
In enigma, perchè cussì l'usava
Parlar con tutti quei, che 'l consegiava.
Pronuncia donca el bon servodedio:
Per vu sior Zogelier ghe vol un legno;
E voltà al'Avocato: e a vu, ben mio,
Manco chiacole digo, e più contegno;
E vu, caro el mio sior Conte sbasio,
Leveve su a bonora, e ve mantegno,
Che se fè talequal se fortunai.
V'ò dito tutto quanto. Adio, spiantai.
El Conte, el Zogelier, e l'Avocato
Senza più bater beco, volta via,
Disendo tuti tre: mo che Fratato!
Mo che tratar xe el soo, sangue de dia!
Che bela cossa mai gavemio fato
A far cussì a penini quatro mia?
Manco chiacole, legno, su a bonora...
Cossa vol dir sta roba in so bonora?
Ma l'Avocato a forza de pensar
À capio, ch'el Romito xe un portento
In renga lu no fava che sbragiar,
Saltando sempre fora d'argomento;
Per cossa mo? per no voler studiar,
Ma come el gera un omo de talento,
El s'a messo ala via, e in t'un sol mese
L'è deventà dei primi del paese.
El Conte prova alzarse una matina
Sul far del dì, e averto el so balcon
El vede vegnir zo dala cusina
El cuogo co un belissimo capon,
El camerier co un galo, e una galina,
E'l so lachè co un fiasco de vin bon;
El li sorprende, el ciga sul momento.
Intendo del bon frate l'argomento,
Anca el nostro gramazzo Zogelier
A capìo, che 'l Romito xe un ometo
El gavea per disgrazia una muger,
Che tuto el dì mandava roba in gheto;
Ma fa ancuo, fa doman un tal mistier,
Perdia! che se n'à acorto el bon cucheto;
E doparando a gradi un bravo legno,
El l'à messa a la fin sul bon contegno.
Saveu quanti ghe n'è de tale quali,
Che xe pitochi, e che no i sa perchè;
Che ga la testa simile ai cocali,
Che se fida de quanti, che ghe xe,
Che tardi se ne acorze dei so mali,
E tardi i va cigando; oh dio! oimè!
Ma rimedio no gh'è per el so mal,
Perchè più no se trova un fra Vidal.