EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
[p. 50 modifica]
IN CESA


La me morosa quando che l’è in Cesa,
     Se l’è sola, la sta con devossion,
     La dise la corona tuta o mesa
     Sentà su ’na carega o in zenocion,

Ma se l'è co’ la Togna o la Taresa,
     O co’ le amighe del so camilion,
     La taca a batolar sora la spesa
     E le saludo Cristo e relijon!....

Cos’èto pagà l’oio... a quanto el sal?...
     Se ’l se càta, l’è grassa che la còla...1
     — Ghe n’èto ti polenta?... no ghè mal.

— Mi no ghe n’ò che per ’na volta sola... —
     E quando la desmete ’sta sonàda,
     La Messa ormai l’è bela e terminada!



Note
  1. grassa che la cola ― è una gran fortuna.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=In_cesa&oldid=71511"