L'astrologo
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Fermeve, viso d'oro,
Fermeve, bela puta,
Che ve contempla tuta
4Un pochetin;
Vedo che avè un sestin
E de la grazia tanta,
Grazia che proprio incanta
8E liga i cuori;
No xe da far stupori,
Come faria un sofista,
Se cussì a prima vista
12Me piasè;
Bisogna che sapiè,
E chi nol sa che quele
Cosse ch'è rare e bele,
16A tuti piase?
Benedete le case
Che ga de ste zogiète
De ste care cossete
20Come vu;
Più che ve vardo, e più
Ve scovro un trato degno,
Ch'al certo passa el segno
24E che no è in uso.
Oh caro quel bel muso,
Cari quei bei ochieti,
Che sieli benedeti
28Dove i varda!
Quela ganassa sguarda,
Quel fronte rilusente,
Quela boca ridente
32E singolar!
Me piase el vostro far,
Me piase el vostro sesto,
Un far ch'a del modesto
36E del furbeto.
Un cuor vu gavè in peto
Che a la fisonomia
Xe tuto cortesìa
40E senza orgoglio.
Mi strolegar ve voglio,
Se vu volè però,
E ogni cossa dirò
44Che sarà vera.
Animo, bela ciera,
Animo via, pian pian,
Dè qua, deme la man,
48E ben slarghela.
Che cara puta bela,
Vu me vardè e ridè,
E forsi no credè
52Che mi indovina?
Oh che man molesina,
Rotondeta, palpabile;
Oh che manina amabile
56Ch'è questa!
Sta linea manifesta
Che gavè un far grazioso,
Un far che xe amoroso
60Verso ognun,
No avè difeto alcun,
Ma sè tuta bontà,
Co un cuor che a la pietà
64Molto l'inclina.
In fìn da picolina
Spirevi grazia e amor,
E ve lassava el cuor
68Chi ve vedea.
E quanto in vu crescea
I ani, crescea ancora
Quel trato che inamora
72E che avè adesso.
So che sè stada spesso
Da più d'uno bramada;
Tanto vu sè stimada,
76Mia careta!
Sapiè, Nina dileta,
Che gh'è un zoveneto
Che scolpìa in mezzo al peto
80Lu ve tien.
Se a questo vorè ben,
Nè a altri badarè,
Credelo, passarè
84Bona fortuna.
Molto poche, o nissuna,
Ga un far giudizioso
E d'un solo moroso
88Xe contente;
Ma vu, che sè prudente,
E ch'avè un cuor de late,
No sarè de ste mate
92Gazarae,
Che alfin resta burlae
Col far l'amor a tanti,
E in ultima i so amanti
96Po se stufa;
Onde le fa la mufa,
E stà ligade al palo,
Che ognuno ghe fa 'l balo
100De l'impianto.
La costanza xe el vanto
Che una puta aver deve;
Donca vu regoleve,
104E siè costante;
No stè badar a tante
Promesse che fa i putì,
Perchè promete tuti
108E pochi tende.
Chi d'amor se n'intende
E sa quanto ch'el possa,
No casca in te la fossa
112Facilmente.
Ve prego, tegnì a mente
El mio parlar sincero,
Che mi ve digo el vero,
116E vere cose.
Quando de farse spose
Certune à fissà el chiodo
Le vol far a so modo
120In ogni via;
E per quanto ghe cria
Le mare e i pari, oibò,
No le se tol no zo
124Dal so pensier;
A deventar muger,
Le crede ste meschine
De deventar regine.
128Oh poverazze!
Tante pessime razze
Gh'è d'omeni a sto mondo
Che no gh'è fin nè fondo
132A dirle tute.
Quante povere pute
Le incontra in dei marii
Che i se chiama pentii,
136E de che sorte!
E a la grama consorte
I te ghe volta quelo,
E i cerca del bordelo
140In altra parte.
Con altre i fa le carte,
Se ben i è maridai,
E la muger sta in guai,
144Sospiri e pianti.
Oh quanti mai, oh quanti,
La note i le carezza,
E 'l dì co indiscretezza
148I le strapazza!
Quanti avari de razza
Per no spenderghe e farghe
I lassarìa mostrarghe
152In fin el Q!
E qualche turlulu
Che gelosìa po ga,
Sempre ghe sta tacà
156Soto le cotole.
Queste no le xe frotole:
Perchè vòi che sapiè,
Che de tristi ghe n'è
160Più che de boni.
Le incontra in dei baroni
Che ghe magna le dote,
Che ghe da de le bote
164E le maltrata;
Ora i ghe dise: mata,
Ora i la maledise.
Ora bruta i ghe dise,
168E qualcoss'altro.
Tropo contrato scaltro
Adesso è 'l maridarse;
Va a gara d'oselarse
172Sposa e sposo.
Quel tal xe fio pietoso,
Xe fio savio e modesto,
Xe sparagnin, xe onesto
176E ritirado,
Ma dopo maridado
Ecolo un scavezzon
Discolo e tripudion
180Fora dei modi.
Quel'altro è uno dei sodi,
No à pratiche cative,
Mezzo chietin el vive,
184Oh che bontà!
Ma dopo acompagnà
L'è un vero magazen
De vizj colmo e pien,
188E trista cola;
E la povera fiola,
Se no l'è rassegnada,
Cussì mal intrigada,
192L'è in galìa.
Donca, mia bela fia,
Vu che gavè giudizio
No fè mai per caprizio
196Sto gran passo.
Quante per puro spasso
Ghe n'è che s'acompagna.
E po dopo le magna
200El pan pentì!
Vu no farè cussì;
Al ciel racomandeve,
E in tuto rimeteve,
204Al so voler;
Sì, se volè goder
Contenta contentissima
Na vita felicissima
208E beata.
Dona, puta garbata,
E degna d'ogni ben,
Penseghe suso ben
212Che v'ò avisà.
Sto passo che xe qua,
Onde no scapuzzar,
Certo convien pensar
216Prima de farlo.
Orsù, altro no parlo,
Capì, se avè cervelo;
Caro quel muso belo,
220A rivederse.