L'imbrogion
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Un desiderio | Edission e fonte ▼ | Pieroto → |
Menego Supegà,
De profession pitor,
Furbo al de là,
Discolo estremamente e zogador,
5Uno de quei strozzai,
Che su la tera
Ghe ne ze sparpagnai
Miera coi miera,
Ma che co tute le scarsele vode
10O de rufe o de rafe i se la gode,
l'altra note perdia
Tolto dal goto
Zogando a l'osteria
L'à perso mile lire de capoto
15Con un foresto ebreo,
Un certo Mardocheo,
Barador per la vita, e prepotente,
Che senza far preamboli al perdente
Ghe intima sul mumento
20Tempo vintiquatr'ore el pagamento.
Sicuro Supegà che in casa in strada,
Se mai drento el dì drio nol lo pagava,
Qualche seria filada
Sior Mardocheo ghe fava.
25Al verde come 'l gera
Va via co la so testa
Studiando la maniera
De trovar el bon omo che ghe impresta
La suma necessaria,
30E tanto se savaria,
El pensa tanto suso che alafin
Ghe vien in mente
Un certo Pulesin
Deto Campana,
35Che gera so parente
A la lontana,
Avaro, interessà,
Ma a l'ecesso zucon,
El qual avendo sempre acumulà
40Se trovava paron
A conti fati
De un bon mier de ducati;
E per sto consolante ritrovato
Nel so interno beato
45Diseva fra de lu vogia o no vogia
Pulesin mio bisogna che te imbrogia.
Ze za apena matina, e Supegà
Da l'urgenza obligà,
Core a cercarlo, e intanto,
50Nel'intrigo proveto, l'organizza un impianto
Da poder certo conseguir l'efeto;
El se lo topa in casa
Alzà da leto alora
Perchè gera abonora,
55Lo strucola, lo basa,
E mostrando alegria
Nela fisonomia
Ghe dise el furbo:
— Scusime Pulesin se te disturbo,
60Ma sicome fra tuti i mii parenti
Ti, senza complimenti,
Che ti è un omo d'onor,
Che ti ze de bon cuor,
Che no ti è avaro,
65Ti, credime, ti è quelo
Che me ze più simpatico, e più caro
De un pare, de un fradelo;
E sicome dei dati
Go avudo replicati
70Da creder fermamente
Che serva a consolarte
El ben de un to parente,
Cussì vegno per farte
La ingenua confidenza,
75Che in modo inaspetato e singolar
Me vol beneficar
La Providenza;
Do quadri da cartelo
De l'imortal penelo
80De Tizian
Da un sanser de Milan,
Col qual nei dì passai
M'ò avudo da trovar per acidente,
Oferti i me ze stai,
85E per tremile lire solamente,
Quando a venderli mal
Se radopia de certo el capital,
E sucedendo el caso
In qualcun de intivar
90Che gabia naso,
Se pol anca cavar,
Se 'l ve li dà,
Domile scudi, e che la staga là.
De sta fortuna in grando,
95De sta vera bubana
Aprofitando,
Dal nodaro Susana,
Che ga studio qua arente,
Go stipulà el contrato,
100E ancuo precisamente,
A termini del pato
Contemplà da l'articolo dusento
Me scade el pagamento,
Mancando al qual, l'è chiara
105Resta nulo el contrato, perdo alora
Vintiquatro zechini de capara,
Che uno sora l'altro go dà fora,
Me scampa in sta maniera
Una rissorsa vera,
110Un guadagno sicuro;
Ma quelo, te lo zuro,
Che sora tuto me despiasarave,
Perchè so estremamente delicato,
Ze che cussì farave
115Una figura che no go mai fato.
Mile lire le go bele e lampanti,
Guadagnae geri sera a faraon
Co la combinazion
De quatro fanti,
120Sui quali go pontà
Senza sparagno,
Avendo su lassà
Posta e guadagno,
Impiantando da prode l'aversario
125Sul quinto fante capità contrario,
Ma ste altre domile no le go,
E sicome lo sò,
Che se qualcun pregasse
Perchè 'l me le imprestasse
130Un torto grando
Ghe faria al to bon cuor,
Sicuro del favor
Te le domando;
Tanto po per cautarte,
135Quanto per acordarte
Un premio, grando no ma suficiente,
Essendote parente,
Te farò
Invece per domile e cinquecento
140Nei modi regolari un pagarò,
Tempo dodese mesi al pagamento,
Volendo aver tranquila la conscienza
De poder sodisfarte a la scadenza. —
Pulesin inzucà
145Da sto drezzagno,
E assae soleticà
Da l'idea seducente del guadagno,
Che facendoghe el conto,
Lo trovava un pan onto,
150Dopo pensà ben suso el ghe caluma
Tuta intiera la suma.
Alora Supegà
In seguito a la corsa inteligenza
Un pagarò ghe fa,
155Ma lassandoghe fora la scadenza,
Contento el berechin
De aver condoto a fin
Col più felice efeto
El so tristo progeto,
160Andando co sta trufa
Mile lire de debito a pagar,
E mile a iscarselar
Senza la fufa,
Che causa l'omission
165Del dì de l'estinzion
Sia in caso Pulesin de farghe i ati,
E col proponimento da birbante
De no vegnir a pati,
Ma de farghele fora tutequante.
170L'ano gera passà,
Passà un bel toco,
E no avendo più visto Supegà,
El povaro marzoco
Messo in qualche aprension,
175Che quel galioto
Gabia la rea intenzion
De magnarghele tute de capoto,
Ghe scrive con calor più d'un biglieto,
Nè vedendolo ancora a capitar
180Se ghe aumenta el sospeto
Che l'abia stabilio de no pagar,
Tantochè se risolve de andar lu
In cerca de culù,
E dopo tanti dì che l'à zirà
185Senz'averlo trovà,
Da la paura
Che ghe deventa el credito perento,
El pagarò presenta a la Pretura
Per le lire domile e cinquecento,
190Instando che la vogia esercitar
Le pratiche ocorenti
Verso quei che a pagar
Ze renitenti;
Ma quel ufizio esato,
195Che 'l difeto obligato
Ga capio,
Ghe dà l'istanza indrio
Co un atergato
Apresso poco del tenor seguente:
200— Se ritorna al petente
Per l'unica rason,
Che non essendo stà
El dì determinà
De l'estinzion,
205No ghe ze oposizion,
La parte debitrice ze in dirito
De protrar el paregio a l'infinito. —
Quantunque el literal de sta sentenza
Podesse meritar qualche ecezion
210Da chi sà ben tratar giurisprudenza,
Pulesin, da una dose de melon
Generosa anca tropo favorio,
Quando che l'à sentio
El deciso tenor
215De l'atergato
L'à dà segni da mato,
E in mezzo el so furor,
Nei lucidi intervali,
Che concede sti mali,
220Chiama de qua e de là
Zente in agiuto
A cercar dapertuto
Supegà,
Un premio pronto e grando
225A quelo che lo trova assicurando;
E sicome ne prova l'esperienza
Che chi ga soldi à sempre superà
Quele dificoltà,
Che no pol superar quel che ze senza,
230Cussì da là non molto
Uno ghe vien a dir,
Che in ospeal l'amigo ze stà acolto,
E che l'è drio a partir
Per l'altro mondo;
235Alora furibondo
Nol fa nè ben nè mal
El core a l'ospeal,
Dove avendo podesto
No so con che pretesto
240Entrar da Supegà,
Che duro e dreto
El gera destirà
Col prete al leto,
Lo chiapa per el colo,
245E se mete a cigar — can no te molo,
Vogio che qua ti staghi,
No te lasso morir se no ti paghi. —
Contà che v'ò sto trato
Veramente da mato
250Dovaria
La fiaba esser finia,
Avendo co l'ho fata
El solo fin
De dir la stravagante intemerata,
255Che a Supegà ga fato Pulesin,
E aver una esperienza
Anca sta volta
Quanto possa contar su la pazienza
De queli che me ascolta;
260Ma se a qualche zucon no ghe bastasse,
E invece domandasse,
Curioso un poco tropo
Sto misero talento,
Cossa ze nato dopo,
265La fiaba a simiotar de sior intento,
Ghe dirò, che corendo l'infermier,
Per fortuna da là poco lontan,
Più assae de un can levrier,
El ghe l'à tolto fora da le man
270Con imensa bravura e co fadiga
Impedindo cussì che 'l lo destriga.
Me ze po stà contà,
Che Pulesin furente
I zorni à terminà
275Miseramente,
E, permission de Dio,
Supegà, quel birbante, ze guario,
Ma seguitando le so male azion
L'è morto ancora zovene in preson.
280L'avaro va sogeto
A perder l'inteleto
Se mai per acidente
In qualche afar el resta socombente,
E l'inonesto
285Paga el fio dei so fali o tardi o presto.