Un desiderio
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La cavalcata | Edission e fonte ▼ | L'imbrogion → |
Certo sior Marco Taco da Messina,
Dotor in medicina,
Omo de gran talento,
Quelo che del siecento
5E no sò quanti
Con aplauso infinito
Un poema ga scrito
In vinti canti
Sui palpiti del cuor,
10E sui sforzi d'amor
Co l'è de quelo
Che irita la membrana del cervelo,
Usando espressamente
A certi passi astrusi un tal mistero
15Da poderlo dir su liberamente
Drento el più scrupoloso monastero;
Sto sior Marco che a forza de studiar
Quando che s'à tratà de maridarse
El ga volesto Socrate imitar
20Per non aver motivo de inquietarse,
E poder far tranquilo el so mistier,
Gaveva per muger
Certa Pandora,
Una brava signora,
25Bona, ma povareta
Una vera saeta,
Un bacalà,
Bruta come 'l pecà,
E co sti doni ingrati una de quele
30Per castigo de Dio
Che ze sempre a la pele
Del mario.
Lu de principi onesto,
De caratere fredo e mansueto,
35Sina che l'à podesto
Ha tirà dreto,
L'à contentada in tuto,
L'à fato l'orbo, el muto,
Nè mai de so muger a la presenza
40S'à lassà trasportar da l'impazienza.
Ma un dì nel so studio el gera là
Tuto insatanassà,
E deventava mato
A scriver un tratato
45Per provar l'influenza,
Che dopo i pochi mesi de la cuna,
E dopo i ani de l'adolescenza,
Sora le done esercita la luna,
Pandora vede entrar
50Che ghe va arente,
No se sà a cossa far
Precisamente,
Ma se crede con pratiche d'afeto
De quele da doverlo incomodar
55Più assae del consueto,
E no trovando un certo acolgimento
Se ghe mete a esclamar
Sto complimento:
— Perchè 'l destin tiran
60No m'alo fato un libro che cussì
Marco fra le to man
Me trovaria ogni dì! —
Risponde so mario:
— Ah! lo volesse Idio,
65Sarave contenton
Corpo de baco,
Per altro a condizion
Che ti fussi mia cara un almanaco.—
Co gran sorpresa alora
70Ghe domanda Pandora:
— Percossa un almanaco?
El voto me par strano,—
E pronto Marco Taco
— Per baratarle ogn'ano. —
75A sta dichiarazion,
Per dir la verità poco obligante
Pandora la ze andada in conclusion,
E so mario
Pentio
80Ga dà el calmante.
Deve i marii discreti
Tolerar la muger coi so difeti;
Ma i omeni prudenti,
Che a dir la verita no ghe n'è tanti
85Studia i temperamenti
De quela, che i vol tor, dei mesi avanti.