La mama no vol
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Una suplica a la «Bepi» | Edission e fonte ▼ | Vustu vegnir co mi? → |
Se ghe domando a Màlgari:
― Posso vegnir de su?... ―
La me risponde in còlera
De no volerme più!
La dise che tasa...,
Che za no se pol!...
― Morosi per casa
La mama no vol!
Quando ghe digo: ― Bàsime...,
Se no... te baso mi!...
La me promete un mèmini
Cantandome cussì:
― Xe megio che 'l tasa...
Che za no se pol!...
Che i tosi me basa
La mama no vol!...
Se ghe domando: ― Barbara,
Dove el to cuor xe andà?... ―
La me risponde: ― Caspita!...
Mi lo go sempre qua!...
Ma darlo in premura
Le tose no pol!...
La lege xe dura:
La mama no vol!
Finchè, finchè..., xe inutile..,
L'anelo in deo no go...,
Pol capitarme un prinçipe
Che ghe dirò de no!
Co mi, benedeto,
Scherzar no se pol!...
Ghe digo e ripeto:
La mama no vol!
Ah!... se me salta el rèfolo
Cambio d'idea... perchè
L'amor co sti propositi
De moda più no xe!
Co Malgari bela
Scherzar no se pol...
La ga sempre quela:
La mama no vol!
Se vede ben che Malgari
Nata no xe per mi...,
Che perdo el tempo e... in ultima,
La me dirà cussì:
Xe megio che 'l tasa,
Che za no se pol!...
Che i tosi me basa
La mama no vol!
- Note
- ↑ Questa poesia ebbe l'onore del Primo premio (L. 60 e Diploma) al primo Concorso poetico-musicale della Filarmonica Società Giuseppe Verdi, bandito pel 1895 in occasione della tradizionale Festa popolare veneziana del Redentor.